អាជ្ញាធរ​ក្រុងហ្សាកាតា ប្រទេស​ឥណ្ឌូណេស៊ី បាន​ព្រមានផាកពិន័យ​ប្រជាជន​ដែលមិនព្រមចាក់វ៉ាក់សាំងកូវីដ១៩ ក្នុងទឹកប្រាក់ ៥លានរូព្យ៉ា (ឬ៤៥០ដុល្លារ)។

​លោក Ahmad Riza Patria អភិបាលរង​ក្រុងហ្សាកាតា បាន​បញ្ជាក់ថា អាជ្ញាធរ​ក្រុង​គ្រាន់តែគោរព​តាមច្បាប់ ហើយ​ការដាក់ទណ្ឌកម្មនេះ គឺជា​ជម្រើសចុងក្រោយ។

លោកថា៖ «ប្រសិន​បើអ្នកជំទាស់មិនចាក់វ៉ាក់សាំង គឺមានវិធានការពីរ ដោយទីមួយ​ រដ្ឋមិនផ្តល់​ជំនួយសង្គម​ឱ្យ និង​ការផាកពិន័យជាទឹកប្រាក់»។

ឥណ្ឌូណេស៊ី បានចាប់ផ្តើម​ចាក់វ៉ាក់សាំងកូវីដ១៩ របស់ចិន Sinovac កាលពីខែមករា ហើយគិតមកត្រឹមថ្ងៃទី២១ ខែកុម្ភៈ ឆ្នាំ ២០២១ ​ប្រទេស​នេះបានចាក់វ៉ាក់សាំងប្រមាណជាង ១,៩លានដូស​ហើយ។

ឥណ្ឌូណេស៊ី មានករណីឆ្លងកូវីដ១៩សរុបជាង ១,២៧លាននាក់ ក្នុងនោះស្លាប់ ជាង ៣,៤ម៉ឺននាក់ និង​ជាសះស្បើយជាង ១,០៨លាននាក់៕