យោធាថៃ បាន​បញ្ជាក់នៅដើមខែមីនានេះ​ឱ្យដឹងថា មាន​ពេទ្យ​យោធាម្នាក់​បាន​ចាក់ទឹកបន្លំ​វ៉ាក់សាំង​ឱ្យ​កងទ័ព​រក្សាសន្តិភាព​អង្គការសហប្រជាជាតិ នៅក្នុងប្រទេសស៊ូដង់ខាងត្បូង។

ពេទ្យនោះ​បាន​ប្រាប់កងទ័ពមួកខៀវថា ទឹកដែល​ខ្លួនចាក់ឱ្យ គឺ​ជាវ៉ាក់សាំងផ្តាសាយ​ដែល​ការពារជំងឺកូវីដ១៩បាន។ នេះបើតាម​ការបញ្ជាក់​របស់​លោក Chalermpol Srisawat មេបញ្ជាការកងទ័ពថៃ។

វ៉ាក់សាំងក្លែងក្លាយនេះ ត្រូវបានចាក់ឱ្យកងទ័ព​ប្រមាណ ២៧៣នាក់ ដោយយកតម្លៃ ២០ដុល្លារអាមេរិក ក្នុងម្នាក់។

កងទ័ពមួកខៀវម្នាក់ បានកើតក្តីសង្ស័យ បន្ទាប់ពី​កត់សម្គាល់​ឃើញថា ដបវ៉ាក់សាំងក្លែងក្លាយនោះ ពុំមានផ្លាកសញ្ញាត្រឹមត្រូវអ្វីឡើយ ហើយក៏រាយការណ៍ទៅថ្នាក់លើ ទើបបែកការណ៍ថាដបនោះ​ផ្ទុក​ទឹកធម្មតាប៉ុណ្ណោះ ពុំមែនជាវ៉ាក់សាំងនោទេ។

ក្រោយហេតុការណ៍នេះកើតឡើង គ្រូពេទ្យ​ខាងលើ​ត្រូវបាន​បណ្តេញ​ចេញឱ្យមកប្រទេសថៃវិញ និងព្រមាន​យោធាថៃ កុំឱ្យមានរឿងនេះកើតឡើងម្តងទៀត។ គ្រូពេទ្យបោកប្រាស់នេះ ត្រូវបាន​ដកអាជ្ញាបណ្ណ និង​បណ្តេញ​ចេញ​ពីជួរទ័ពថៃផងដែរ៕