យុវតីមីយ៉ាន់ម៉ា Kyal Sin អាយុ១៩ឆ្នាំ ដែលត្រូវបាន​សមត្ថកិច្ចបាញ់​ចំក្បាលស្លាប់​ក្នុងបាតុកម្មកាលពីថ្ងៃទី៣ ខែមីនា ឆ្នាំ​២០២១ គឺ​ធ្លាប់បង្ហោះ​សារនៅលើហ្វេសប៊ុករួចជាស្រេចថា បើនាងស្លាប់ នាង​សុខចិត្តបរិច្ចាគសរីរាង្គរបស់នាងទាំងអស់។

មុនទៅចូល​រួមបាតុកម្ម នៅក្រុង​ Mandalay វីរនារីបាតុកររូបនេះ បានបង្ហោះ​នៅលើទំព័រហ្វេសប៊ុករបស់នាង ដោយបានដាក់ប្រភេទឈាម និងលេខទូរសព្ទរបស់នាង ហើយថាសរីរាង្គរបស់នាង​គឺ​សម្រាប់យកទៅបរិច្ចាគ ប្រសិន​បើមានរឿងអ្វីកើតឡើង​ចំពោះរូបនាង។

គួរដឹងថា ក្នុងខ្សែអាត់វីដេអូដែលថតជាប់រូប Kyal Sin ​ពេលធ្វើបាតុកម្មនោះ គេសង្កេតឃើញ​នាងពាក់អាវយឺតខ្មៅនិងមានអក្សរអង់គ្លេសថា «Everything will be OK»។ ក្នុងវីដេអូគេបានលឺសំឡេងនាង​ស្រែកថា «យើងមិនរត់ទេ» ហើយភ្លាមនោះ ស្រាប់តែមានគ្រាប់កាំភ្លើងបាញ់ចំត្រូវក្បាលរបស់នាងតែម្តង។

ពិធីបញ្ចុះសព​របស់នាង​ត្រូវបានធ្វើឡើង​នៅថ្ងៃទី៤ ខែមីនា ឆ្នាំ​២០២១ ដោយមានអ្នកចូលរួមរាប់រយនាក់។ អ្នកចូលរួម​ភាគច្រើន​ដែលសុទ្ធតែវ័យក្មេង បាន​លើកម្រាមដៃ៣ និង​ស្រែកច្រៀងព្រមគ្នា​ប្រឆាំងនឹង​រដ្ឋប្រហារយោធា ដែលបណ្តាលឱ្យប្រទេស​ធ្លាក់ចូលភាពចលាចល។

Kyal Sin ស្ថិតនៅក្នុងចំណោម​មនុស្ស៣៨នាក់ ដែល​ត្រូវបានសមត្ថកិច្ចមីយ៉ាន់ម៉ា បាញ់សម្លាប់​ក្នុងការតវ៉ានោះ៕