រដ្ឋអំណាចយោធាមីយ៉ាន់ម៉ា បាន​ស្នើសុំឱ្យភាគីឥណ្ឌា ប្រគល់​ប៉ូលិស​ ៨នាក់​ដែល​រត់គេច​ចេញពីមីយ៉ាន់ម៉ា ចូលទឹកដីឥណ្ឌា។

ប៉ូលិសប្រមាណ៣០នាក់​រួមទាំង​ក្រុមគ្រួសារ​ ត្រូវបានរាយការណ៍ថា បាន​រត់គេចឆ្លងចូលព្រំដែន​ឥណ្ឌា ព្រោះ​តែពួកគេមិនចង់ធ្វើតាមបញ្ជារបស់យោធាដែល​ធ្វើរដ្ឋប្រហារ​ទម្លាក់រដ្ឋាភិបាល​​ស៊ីវិលកាលពីដើមខែកុម្ភៈ។

លោកស្រី Maria C.T. Zuali មន្រ្តីជាន់ខ្ពស់​ប្រចាំ​ក្រុង Champhai នៃរដ្ឋ Mizoram ប្រទេស​ឥណ្ឌា បាន​ប្រាប់ Reuters នៅថ្ងៃទី៦ ខែមីនា ឆ្នាំ​២០២១​នេះថា លោកស្រី​បាន​ទទួល​សំបុត្រមួយច្បាប់​ពី​អាជ្ញាធរក្រុង Falam នៃប្រទេសមីយ៉ានម៉ា ដែល​ពួកគេបាន​ស្នើសុំ​ប្រគល់ប៉ូលិស ៨រូបដែលរត់គេចនោះ ដើម្បីរក្សា​ទំនាក់ទំនង​រវាងប្រទេសទាំងពីរ។

យ៉ាងណាមិញ​លោកស្រីបញ្ជាក់​ថា លោកស្រី​ក៏កំពុងរង់ចាំ​ការណែនាំដោយផ្ទាល់​ពីក្រសួង​កិច្ចការ​ផ្ទៃក្នុង​នៃប្រទេសឥណ្ឌាជាមុនសិនដែរ។

ក្នុងសំបុត្រនោះ​មានខ្លឹមសារថា៖ «ដើម្បីរក្សា​ទំនាក់ទំនង​មិត្តភាព​រវាងប្រទេសជិតខាងយើងទាំងពីរ សូមអ្នក​ឃុំខ្លួនប៉ូលិសទាំង៨នាក់ដែល​បានចូលទឹកដី​ឥណ្ឌា ហើយប្រគល់មកឱ្យ​មីយ៉ាន់ម៉ាវិញ»។

ទន្ទឹមនឹងនេះ ក្នុងសំបុត្រ​ក៏បាន​បញ្ជាក់​លម្អិត​នូវឈ្មោះប៉ូលិស ៤នាក់ ដែលមានអាយុពី ២២ ទៅ ២៥ឆ្នាំ ក្នុងនោះមានប៉ូលិសស្រីម្នាក់​ផងដែរ៕