រដ្ឋបាលខេត្ត​កំពង់ធំ បាន​ជូនដំណឹង​កាលពីម្សិលមិញថា យុវតីមា្នក់ ឡេង មីងហួយ អាយុ១៦ឆ្នាំ រស់នៅ​ភូមិគិរីអណ្តែត ឃុំទ្រៀល ស្រុកតាំងគោក ខេត្ត​កំពង់ធំ គឺមានវិជ្ជមានកូវីដ១៩។

រដ្ឋបាល​ខេត្ត​បញ្ជាក់​ថា នៅថ្ងៃទី២៨កុម្ភៈ នាង​បានទៅជួបជុំ​ជាមួយតែម្តាយ​ឈ្មោះ អ៊ា យ៉ុម អាយុ៣៧ឆ្នាំ និងបងប្រុស​ឈ្មោះ ឡេង រ៉េត អាយុ១៩ឆ្នាំ។

យ៉ាងណាមិញ នៅព្រឹកថ្ងៃទី៨មីនានេះ ក្រសួងសុខាភិបាល​បាន​ប្រកាស​ថា ស្រ្តី​ជនជាតិខ្មែរ អាយុ៣៧ឆ្នាំ (មិនបញ្ចេញ​ឈ្មោះ) រស់នៅ​ភូមិគិរីអណ្តែត ឃុំទ្រៀល ស្រុកតាំងគោក ខេត្ត​កំពង់ធំ មានវិជ្ជមានកូវីដ១៩ផងដែរ។ នេះ​អាចបញ្ជាក់​បាន​ថា វា​​ជាករណី​ឆ្លងកូវីដ១៩ ពីកូន ទៅម្តាយ។

បើតាម​រដ្ឋបាល​ខេត្តកំពង់ធំ យុវតី ឡេង មីងហួយ ក៏បាន​ធ្វើដំណើរ​ទៅសួរសុខទុក​ជីតានៅផ្ទះ និង​អ្នកជុំវិញ​ផ្ទះនោះ នៅថ្ងៃទី១ ខែមីនា ឆ្នាំ​២០២១។ ហើយ​នៅថ្ងៃទី២ ខែមីនា នាងបានចូលរួម​បុណ្យសព​ជីតា (ដែលបានស្លាប់) ដែលមាន​អ្នកចូលរួមជិត ៥០នាក់។ ថ្ងៃទី៣មីនា នាង​បានចូលរួម​ហែសព​ជីតា​ទៅកាន់​វត្តគិរីអណ្តែត ដែលមានអ្នកភូមិ​ចូលរួម​ជិត ៥០នាក់៕