រដ្ឋាភិបាល បាន​បញ្ជា​ឱ្យ​ដាក់ទ័ពប៉ារ៉ា (Assam Rifles) នៅតំបន់​ភាគឦសាន ជាប់​ព្រំដែន​​មីយ៉ាន់ម៉ា ដើម្បីទប់ស្កាត់​ការលួចឆ្លងដែនចូលខុសច្បាប់របស់​ប្រជាជនមីយ៉ានម៉ា ដែល​រត់គេច​ពី​រដ្ឋអំណាចយោធា។

ប្រភពពីកងទ័ព​ប៉ារ៉ានេះ បាន​បង្ហើប​ឱ្យដឹងថា ការចេញបញ្ជាខាងលើ គឺ​ជាសារបញ្ជាក់យ៉ាងច្បាស់​ និង​ប្រាកដនិយម ពោលគឺ​គ្មាន​ជនជាតិមីយ៉ាន់ម៉ាណាម្នាក់ ត្រូវបាន​អនុញ្ញាតឱ្យចូល​ទឹកដីឥណ្ឌា ដោយ​គ្មានទិដ្ឋាការ ឬលិខិតអនុញ្ញាតអ្វីមួយនោះទេ។

គួរដឹងថា ភូមិរបស់​មីយ៉ានម៉ា ចំនួន២៥០ភូមិ និងមានប្រជាជន​ជាង ៣០ម៉ឺននាក់ រស់នៅតាមបណ្តោយព្រំដែន​ ប្រវែង១០គីឡូម៉ែត្រ ក្នុងនោះ​គឺ​តែងមានមនុស្ស​ឆ្លងកាត់ព្រំដែន​ចូល​ឥណ្ឌា ខ្លះស្របច្បាប់ និងខ្លះខុសច្បាប់។

គួរកត់សម្គាល់​ដែរថា ការចេញ​បញ្ជានេះ​ធ្វើឡើង​ក្រោយពេល​ដែល​យោធាមីយ៉ាន់ម៉ា បាន​ស្នើសុំឱ្យភាគីឥណ្ឌា ប្រគល់​មន្រ្តីប៉ូលិស​មីយ៉ាន់ម៉ារូប ដែលលួចរត់ចូលឥណ្ឌា មកឱ្យខ្លួនវិញ ដើម្បីរក្សា​ទំនាក់ទំនង​ល្អរវាងប្រទេសទាំងពីរ៕

ប្រភព៖ The Statesman