បាត់ដំបង​ជាខេត្តទី១០ ដែលទើបតែរកឃើញករណីវិជ្ជមានកូវីដ១៩ ពាក់ព័ន្ធនឹងព្រឹត្តិការណ៍សហគមន៍២០កុម្ភៈ ពោលគឺ​កើតឡើង​ស្រ្តីជនជាតិខ្មែរអាយុ ៣០ឆ្នាំ មាន​អាសយដ្ឋាន​នៅភូមិទួលច្រនៀង ឃុំបាយដំរាំ ស្រុកបាណន់ ខេត្តបាត់ដំបង ដោយគាត់​ជាអ្នកមកពី​ខេត្តព្រះសីហនុ។ នេះបើតាមសេចក្តីប្រកាសព័ត៌មាន​របស់​ក្រសួងសុខាភិបាល នាព្រឹកថ្ងៃទី១១ ខែមីនា ឆ្នាំ​២០២១។

សូមជម្រាប​ថា រាជធានីខេត្ត​ដែលមានករណីឆ្លងក្នុងសហគមន៍នេះរួចមកហើយរួមមាន៖ ភ្នំពេញ, កណ្តាល, ព្រះសីហនុ, ស្វាយរៀង, កោះកុង, ព្រៃវែង, កំពង់ចាម, កំពង់ធំ និងសៀមរាប។

គិតត្រឹមព្រឹកថ្ងៃទី១១មីនានេះ កម្ពុជាមានករណីឆ្លងកូវីដ១៩សរុប ១១៦៣នាក់​ ក្នុងនោះជាសះស្បើយ ៥៩៧នាក់។ បើគិតតែ​សហគមន៍២០កុម្ភៈ កើនឡើងដល់ ៦៥២នាក់ ក្នុងនោះជាសះស្បើយ ១១០នាក់៕