ក្នុងបណ្តាញសង្គមហ្វេសប៊ុកមីយ៉ាន់ម៉ា កំពុងផ្ទុះនូវការចែករំលែករូបភាព​ដែលបង្ហាញ​ពីយោធាមីយ៉ាន់ម៉ា គាស់ផ្នូរមួយ ដែលត្រូវបានអ្នកប្រើប្រាស់​បណ្តាញ​សង្គម​អះអាងថាជាការគាស់សព​ Kyal Sin នារីដែលបាន​ស្លាប់ក្នុង​​បាតុកម្ម​កាលពីដើមខែ​មីនានេះ។

ការពិត​រូបភាព​នេះ គឺ​ត្រូវបានគេដាក់ក្នុងវីដេអូ TikTok ដោយបានបង្ហោះ​កាលពីថ្ងៃទី១០ ខែធ្នូ ឆ្នាំ​២០២០មកម្ល៉េះ ពោលគឺ​ជារូបភាព​ដែលបង្ហាញពី​យោធាមីយ៉ានម៉ា កំពុងជីកផ្នូរបុរាណមួយប៉ុណ្ណោះ។ ផ្នូរបុរាណនេះ ត្រូវបាន​រកឃើញ​នៅ​តំបន់ Kyaukpadaung ក្នុងក្រុង Mandalay ភាគកណ្តាលប្រទេសមីយ៉ាន់ម៉ា។

គួរដឹងថា ការ​បង្ហោះរូបភាព​​ដែល​គេយល់ច្រលំខាងលើនេះ គឺ​បន្ទាប់ពី​អាជ្ញាធរមីយ៉ានម៉ា បាន​គាស់​សាកសព​នារីបាតុករ​អាយុ១៩ឆ្នាំ Kyal Sin នៅក្រុង Mandalay ដើម្បី​យកមកធ្វើកោសល្យវិច្ច័យលាងជម្រះភាពសង្ស័យថា ការស្លាប់របស់នាង​គឺមិនពាក់ព័ន្ធនឹង​ការបង្ក្រាបរបស់​ប៉ូលិសមីយ៉ាន់ម៉ានោះទេ៕