ម្ហូប១៤មុខ ដែលស្ដេចខ្មែរសោយ ត្រូវចារឹកលើផ្លាកមាស ទុកជាអាហារពិសេសប្រចាំហាងល្បីនៅសៀងហៃ

2021-03-19 00:54:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ភោជនីយដ្ឋានពិសេសថ្នាក់ជាតិ លីព័រឡាង (Lu Po Liang) គឺជាអគារប្រវត្តិសាស្រ្តបង្គប់ទៅដោយអនុស្សាវរីយ៍យ៉ាងជ្រាលជ្រៅ នៃព្រះមហាក្សត្រខ្មែរ ព្រោះកន្លែងដ៏ល្បីនៅទីក្រុងសៀងហៃនេះត្រូវបានបង្កើតឡើងក្រោយពីព្រះរាជដំណើរទស្សនកិច្ចជាប្រវត្តិសាស្ត្រនៃព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ និងសម្ដេចព្រះមហាក្សត្រីនរោត្ដម មុនិនាថ សីហនុ ព្រះវររាជមាតាជាតិខ្មែរ។

ភោជនីយដ្ឋានពិសេសថ្នាក់ជាតិ លីព័រឡាង (Lu Po Liang)

ដំណើរព្រះរាជទស្សនកិច្ចរបស់សម្ដេចទាំង២ព្រះអង្គ នាគ្រានោះបានធ្វើឡើងនៅថ្ងៃទី១៩ ខែកុម្ភៈ ឆ្នាំ១៩៧៣។ ដើម្បីជាកិច្ចស្វាគមន៍ចំពោះព្រះរាជដំណើរទស្សនកិច្ចដ៏ឧត្តុង្គឧត្តមនាពេលនោះ ថ្នាក់ដឹកនាំកំពូលទីក្រុងសៀងហៃ បានប្រកាសស្វែងរក និងជ្រើសរើសនូវចុងភៅដ៏ចំណានៗ ដើម្បីរៀបចំថ្វាយជាពិសេសនូវព្រះស្ងោយដ៏ល្បីៗរបស់ទីក្រុងសៀងហៃថ្វាយ ព្រះអង្គទាំងទ្វេ ។ ជាលទ្ធផលព្រះស្ងោយចំនួន ១៤មុខ ត្រូវបានចម្អិនឡើងដោយចុងភៅដ៏ល្បីល្បាញនៃទីក្រុងសៀហៃ ដើម្បីថ្វាយព្រះអង្គទាំងទ្វេសោយ នៅក្នុងឧទ្យានយូ ។ នៅវេលាយប់ថ្ងៃដដែលនោះ ព្រះករុណា ព្រះបរមរតនកោដ្ឋ មានព្រះរាជឱង្ការថា «ខ្ញុំសង្ឃឹមថានៅថ្ងៃស្អែកមុនម៉ោង១០ព្រឹក សូមរៀបចំមុខម្ហូបដដែលនេះ ក្នុងមួយមុខចំនួន២ចាន សម្រាប់អាហារថ្ងៃត្រង់របស់ខ្ញុំ»។ នេះបានធ្វើឲ្យក្រុមចុងភៅប្រចាំទីក្រុងសៀងហៃ មានសេចក្តីរំភើបរីករាយ និងត្រេកអរយ៉ាងខ្លាំង ព្រោះបានបង្ហាញយ៉ាងច្បាស់ថា ព្រះមហាក្សត្រកម្ពុជា គឺសម្តេចព្រះ នរោត្តម សីហនុ សព្វព្រះរាជហឫទ័យយ៉ាងខ្លាំងចំពោះស្នាដៃចម្អិនម្ហូបរបស់ពួកគេ។

ព្រឹត្តិការណ៍ខាងលើនេះ ត្រូវបានចាត់ទុកជារឿងនិទានដ៏ល្បីមួយសម្រាប់ភោជនីយដ្ឋាន លីព័រឡាង នៅសៀងហៃ ដែលមានចំណងជើងថា "ពិធីជប់លៀងតូចមួយនៅលើពិភពលោក"។

នៅក្នុងពេលនោះឧទ្យានយូ ពុំទាន់មានភោជនីយដ្ឋានពិសេសណាមួយសម្រាប់បង្អួតនូវរសជាតិដ៏ពិសេសនៃម្ហូបរបស់ទីក្រុងសៀងហៃនោះឡើយ ហើយដើម្បីជាកិច្ចងាយស្រួលសម្រាប់ការរៀបចំថ្វាយព្រះរាជបដិសណ្ឋារកិច្ចស្វាគមន៍ចំពោះព្រះរាជដំណើររបស់ព្រះអង្គ នាឱកាសក្រោយទៀត ទើបនៅក្នុងឆ្នាំ១៩៧៩ ចុងភៅមួយក្រុមដែលបានចម្អិនព្រះស្ងោយទាំង១៤មុខនោះថ្វាយព្រះអង្គ បានផ្តួចផ្តើមគ្នាបង្កើតឡើងនូវភោជនីយដ្ឋានពិសេសថ្នាក់ជាតិ លីព័រឡាង Lu Po Liang នេះឡើង។ ព្រះស្ងោយទាំង១៤មុខនោះ ត្រូវបានចារឹកលើផ្លាកពណ៌មាស តាំងបង្ហាញជាសាធារណៈដែលជាមុខម្ហូបយ៉ាងពិសេសប្រចាំភោជនីយដ្ឋាន។ ចំណែកឯព្រះបរមឆាយាលក្ខណ៍ទាំងឡាយនៃ ព្រះករុណា ព្រះបរមរតនកោដ្ឋ និងសម្តេចព្រះមហាក្សត្រី ព្រះវររាជមាតាជាតិខ្មែរ ក៏ត្រូវបានតាំងបង្ហាញអមដោយប្រវត្តិសង្ខេបនៃដើមកំណើតភោជនីយដ្ឋានដ៏ពិសេសនេះ និងបន្ទប់ដែលព្រះអង្គទាំងទ្វេ ស្តេចយាងមកសោយព្រះស្ងោយនាឆ្នាំ ១៩៧៣ ត្រូវបានរៀបចំជាបន្ទប់ដ៏ពិសេសប្រចាំភោជនីយដ្ឋានដែលត្រូវបានប្រសិទ្ធិនាមថា បន្ទប់ «១៩៧៣»៕