នាយករដ្ឋមន្រ្តីវៀតណាម លោក ង្វៀន សួនហ៊្វុក បាន​ជំរុញឱ្យ​ក្រសួងពាក់ព័ន្ធ​សិក្សា​ពីការ​បើកជើងហោះហើរឡើងវិញ ព្រមទាំងរៀបចំ​ការប្រើប្រាស់​លិខិតឆ្លងដែនវ៉ាក់សាំង (Vaccine Passort) និង​គ្រប់គ្រងពាណិជ្ជកម្មអន្តរជាតិ។ លោក​ថ្លែងដូច្នេះ ក្នុងកិច្ចប្រជុំតាមអនឡានមួយ កាលពីថ្ងៃទី១៧ ខែ​មីនា ឆ្នាំ​២០២១។

លោក​បាន​ប្រាប់ឱ្យ​ក្រសួង​សុខាភិបាល សហការ​ជាមួយ​ក្រសួងដទៃ ដើម្បីចាត់វិធានការ​ទប់ស្កាត់​ជំងឺរាតត្បាត នៅពេល​ដែល​កំពុង​ដំណើររឿង​លិខិតឆ្លងដែនវ៉ាក់សាំង ជាជំហានៗ ក្នុងការបើកព្រំដែន​ឡើងវិញ។

លោក ង្វៀន សួនហ៊្វុក បាន​អំពាវនាវឱ្យ​ដល់ការអនុវត្តកម្មវិធី​ចាក់វ៉ាក់សាំង​ក្នុងប្រទេស ធ្វើយ៉ាងណា​ត្រូវ​តែធានា​សុវត្ថិភាព ហើយ​បន្តពិចារណា​នាំចូលវ៉ាក់សាំង និង​ការ​ស្រាវជ្រាវ​វ៉ាក់សាំង​របស់​វៀតណាម។

គួររំលឹក​ថា ការ​ជំរុញ​លើការប្រើប្រាស់​លិខិតឆ្លងដែនវ៉ាក់សាំង​របស់​វៀតណាមនេះ គឺធ្វើឡើងបន្ទាប់ពីប្រទេសថៃ បាន​ចាប់ផ្តើម​បញ្ចេញ​លិខិត​ឆ្លងដែនបែបនេះ ពោលគឺ​វាជា​វិញ្ញាបនបត្រ​អន្តរជាតិ​នៃការចាក់វ៉ាក់សាំង ឬហៅថា Prophylaxis។

ក្រសួង​សុខាភិបាល​វៀតណាម បានឱ្យដឹងថា គិតត្រឹមថ្ងៃទី១៦ ខែមីនា ឆ្នាំ​២០២១ បាន​ចាក់វ៉ាក់សាំងកូវីដ១៩ AstraZeneca ដល់​ក្រុម​ជួរមុខ​ចំនួន ២០ ៦៩៥នាក់។ ក្នុងនោះមាន ៦នាក់​កើតប្រតិកម្មធ្ងន់ធ្ងរ៕