ម៉ាឡេស៊ី បាន​ប្រកាស​នៅថ្ងៃទី២២ ខែមីនា ឆ្នាំ​២០២១នេះថា ខ្លួនបាន​បង្កើតមូលនិធិ ២,៤លានដុល្លារ ត្រៀម​ផ្តល់សំណង​ជូន​អ្នកកើតមានប្រតិកម្ម​ដោយសារការចាក់វ៉ាក់សាំងកូវីដ១៩។

លោក Adham Baba រដ្ឋមន្រ្តី​ក្រសួងសុខាភិបាលម៉ាឡេស៊ី បាន​ឱ្យដឹងថា ក្រោម​មូលនិធិ​នេះ បុគ្គល​ដែលមានប្រតិកម្ម ដោយសារចាក់វ៉ាក់សាំង ហើយត្រូវបានបញ្ជូនទៅមន្ទីរពេទ្យ នឹងទទួលបានប្រាក់​សំណង ៥ម៉ឺនរីងហ្គីត (ឬជាង ១ម៉ឺន ២ពាន់ដុល្លារ)។ ហើយប្រសិនបើបុគ្គលនោះ ធ្លាក់ខ្លួនពិការ ឬស្លាប់ទៀត គឺនឹង​ទទួលបាន ៥០ម៉ឺនរីងហ្គិត (ឬជាង ១២ម៉ឺនដុល្លារ)។

ប្រទេស​ម៉ាឡេស៊ី បាន​ចាក់វ៉ាក់សាំងដល់​មនុស្សជិត ៤៣ម៉ឺននាក់ហើយ ដោយ​ប្រើប្រាស់វ៉ាក់សាំង Pfizer។ ចាប់តាំងពីចាប់ផ្តើមកម្មវិធីចាក់វ៉ាក់សាំងនៅថ្ងៃទី២៣កុម្ភៈមក គឺ​បានកត់ត្រាអ្នកចេញរោគសញ្ញាប្រតិកម្ម​ចំនួន ២០ករណី គិត​ត្រឹមថ្ងៃទី១៨មីនា តែ​ជារោគសញ្ញាស្រាលៗ ដូចជា រមាស់ ដកដង្ហើមខ្លីៗ និងញ័របេះដូងជាដើម ហើយក៏មិនទាន់មានអ្នកស្លាប់ដែរ៕