ក្មេង​ស្រី​អាយុ៧ឆ្នាំម្នាក់ ត្រូវបាន​ស្លាប់ក្នុងផ្ទះរបស់ខ្លួន នៅពេល​កម្លាំង​សន្តិសុខមីយ៉ាន់ម៉ា បើកការបាញ់ប្រហារ​ទៅលើក្រុមបាតុករនៅក្រុង Mandalay កាលពីថ្ងៃទី២៣ ខែមីនា ឆ្នាំ​២០២១។

បងស្រីរបស់​ជនរងគ្រោះ បាន​ប្រាប់​ប្រព័ន្ធផ្សព្វផ្សាយក្នុងស្រុកថា ការពិត​ប៉ូលិសមីយ៉ាន់ម៉ា​មានទិសដៅ​បាញ់​ទៅលើឪពុករបស់នាង ប៉ុន្តែបែរជាត្រូវប្អូនស្រីដែល​កំពុងតែអង្គុយលេងក្នុងផ្ទះទៅវិញ។

ក្នុងការបាញ់ប្រហារនេះ បុរស២នាក់​ទៀត ក៏ត្រូវបានស្លាប់​ផងដែរ។

គួរដឹងដែរថា បើតាម​អ្នកនាំពាក្យ​រដ្ឋាភិបាលយោធា លោក Zaw Min Tun បាន​និយាយថា​ ក្រុមបាតុករប្រមាណ ១៦៤នាក់ហើយត្រូវបាន​ស្លាប់​ ហើយ​លោក​ក៏បញ្ជាក់ពីភាពសោកស្តាយជុំវិញ​ការស្លាប់នេះផងដែរ ព្រោះពួកគេ​សុទ្ធ​តែជាពលរដ្ឋមីយ៉ាន់ម៉ា។ ការនិយាយបែបនេះ មួយថ្ងៃក្រោយសហភាពអឺរ៉ុប និងអាមេរិក ដាក់ទណ្ឌកម្មបន្ថែម​លើពួកយោធា​ដែល​ពាក់ព័ន្ធនឹងរដ្ឋប្រហារ។

ដោយឡែក​ក្រុមសកម្មជន អះអាងថា មនុស្សយ៉ាងហោចណាស់ ២៦១នាក់ហើយ ត្រូវបាន​ស្លាប់​ក្នុងការបង្រ្កាប​របស់​កម្លាំងសន្តិសុខមីយ៉ាន់ម៉ា៕