ប្រធានាធិបតី​អាមេរិក លោក ចូ បៃឌិន បាន​អះអាងនៅថ្ងៃទី២៥ ខែមីនា ឆ្នាំ​២០២១ ថា ឱ្យតែនៅលោកនៅកាន់តំណែង​លោក​នឹង​ទប់ស្កាត់​មិនឱ្យចិន​វ៉ាដាច់អាមេរិក ក្លាយជាមហាអំណាចលេខមួយ​ក្នុងពិភពលោកបានឡើយ។

លោក បៃឌិន បាន​រំលឹក​ថា ក្នុងអំឡុង​ពេល​លោក​កាន់តំណែង​ជាអនុប្រធានាធិបតី​ជំនាន់​រដ្ឋបាលអូបាម៉ា លោក​បានចាត់​ទុក​ប្រធានាធិបតីចិន ជាជនផ្តាច់ការ មិនមែន​ប្រជាធិបតេយ្យ​ដែល​ជាគន្លឹះ​សម្រាប់​អនាគត​នោះទេ។

ថ្លែង​ទៅកាន់​អ្នកកាសែត​នៅ​សេតវិមាន​ បៃឌិន លើកឡើង​យ៉ាង​ដូច្នេះថា៖ «ចិនមាន​គោលដៅធំណាស់​ក្នុងការ​ក្លាយជា​អ្នកដឹកនាំ​ពិភពលោក ជាប្រទេស​មានជាងគេ និងអំណាចខ្លាំងជាងគេ​។ រឿងនោះ នឹងមិនកើតឡើងឡើយ ព្រោះអាមេរិក​កំពុងបន្តរីកលូតលាស់»។

យ៉ាងណាមិញ លោក បៃឌិន បាន​ប្រាប់​ច្បាស់ៗទៅលោកប្រធានាធិបតីចិន ស៊ី ជិនពីង ថា អាមេរិក​មិនចង់ប្រឈមមុខដាក់គ្នា​ជាមួយចិនទេ ប៉ុន្តែលោក​ទទូចឱ្យចិន​គោរព​ច្បាប់​អន្តរជាតិ ពោលគឺ​ជាពាណិជ្ជកម្ម និងការប្រកួតប្រជែងដោយស្មើភាព ព្រមទាំងគោរព​សិទ្ធិមនុស្ស៕