សំដីមុឹងម៉ាត់! គ្រូបង្គោលជម្រើសជាតិ កម្ពុជា ប្តេជ្ញាចិត្តលះបង់ខ្លួនប្រាណនិងឆន្ទៈកសាងក្រុមឲ្យខ្លាំង

2021-03-28 05:35:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក RYU HIROSE ដែលជា គ្រូបង្គោលថ្មីរបស់ក្រុមបាល់ទាត់ជម្រើសជាតិ កម្ពុជា ទើបនឹងបានតែងតាំងកាលពីថ្ងៃទី ២៦ ខែមិនាថ្មីៗនេះបានបង្ហាញចំណាប់អារម្មណ៍ផ្ទាល់ខ្លួនថា លោកនឹងទទួលខុសត្រូវលើគ្រប់បញ្ហាដែលកើតឡើង ទោះបីមានភាពលំបាកនិងស្មុគស្មាញយ៉ាងណាក៏ដោយ។

លោកបានបញ្ជាក់ថា៖ “ចាប់ពីពេលនេះតទៅ ខ្ញុំនឹងលះបង់ខ្លួនប្រាណ ឆន្ទៈរបស់ខ្ញុំ និងយកបទពិសោធន៍ដែលបានពីអាជីពជាគ្រូបង្វឹកបាល់ទាត់ទាំងប៉ុន្មាន ដើម្បីជួយបណ្ដុះបណ្ដាលឲ្យកីឡាករមានការអអភិវឌ្ឃន៍រីកចម្រើនទៅមុខ និងកសាងក្រុមមួយដែលខ្លាំងសម្រាប់ប្រកួតប្រជែងជាមួយក្រុមនៅក្នុងតំបន់អាស៊ី និងពិភពលោកផងដែរ។”

រូបភាពដោយ៖ FFC

តាមរយៈទំព័រហ្វេសប៊ុកផ្លូវការរបស់ សហព័ន្ធកីឡាបាល់ទាត់កម្ពុជា គ្រូបង្វឹកជនជាតិជប៉ុនរូបនេះបានប្រាប់ថា លោកពិតជាសប្បាយចិត្តដែលបានក្លាយជា គ្រូបង្វឹកក្រុមជម្រើសជាតិ កម្ពុជា ហើយក៏សូមអរគុណដល់បងប្អូនអ្នកគាំទ្របាល់ទាត់កម្ពុជាជួបតែសំណាងល្អ។

ជម្រាបជូនផងដែរថា ប្រវត្តិរូបត្រួសៗរបស់លោក Ryu Hirose មានវ័យ ៥៦ ឆ្នាំ កាន់អាជ្ញាប័ណ្ណគ្រូបង្វឹកកម្រិត AFC “A” Licence ។ លោកធ្លាប់ជាអតីតគ្រូបង្វឹកក្រុមយុវជននៃក្លឹបធំមួយក្នុងប្រទេសចិនគឺ ក្លឹប Guangzhou ហើយលោកក៏ធ្លាប់ជាគ្រូបង្វឹករបស់ក្លឹបថៃដែលលេងនៅលីគ ២ គឺក្លឹប Samut Prakan អំឡុងរដូវកាល ២០១៩ បច្ចុប្បន្នក្លឹបមួយនេះបានឡើងមកកាន់លីគកំពូលថៃ។

លោក Ryu Hirose កាលនៅដឹកនាំក្រុមលីគ ២ ថៃ Samut Prakan

ភារកិច្ចចម្បងក្នុងការកាន់តំណែងនេះ លោកនឹងត្រូវដឹកនាំក្រុម ប្រកួតជម្រុះជុំទី២ FIFA World Cup Qatar 2022 នាអំឡុងពាក់កណ្តាលឆ្នាំ២០២១ ចំនួន៣ប្រកួត, ការប្រកួតជម្រុះពានរង្វាន់ AFC Asian Cup, AFF Suzuki Cup និងព្រឹត្តិការណ៍ SEA Games លើកទី៣១ នាខែវិច្ឆិកា-ធ្នូ ឆ្នំា២០២១ នៅប្រទេសវៀតណាម និងការទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ នៅកម្ពុជាផងដែរ៕

អត្ថបទ៖ រក្សា