ធនាគារពិភពលោក៖ ប្រទេសអ្នកមាន នឹងចាក់វ៉ាក់សាំងបាន ៨០% ខណៈប្រទេសក្រីក្រ បានត្រឹម ៥៥% នៅចុងឆ្នាំនេះ

2021-03-29 03:11:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមរបាយការណ៍ស្តីពី បច្ចុប្បន្នភាពសេដ្ឋកិច្ចតំបន់អាស៊ីបូព៌ា និងប៉ាស៊ីហ្វិក ចេញផ្សាយដោយធនាគារពិភពលោកកាលពីថ្ងៃទី២៦ ខែមីនា ឆ្នាំ២០២១ ឱ្យដឹងថា បើគិតតាមបរិមាណស្តុក និងការបែងចែកវ៉ាក់សាំងនាពេលបច្ចុប្បន្ននេះ បណ្តាប្រទេសឧស្សាហកម្មក្នុងតំបន់នេះ នឹងចាក់វ៉ាក់សាំងកូវីដ១៩ បាន ៨០% នៃប្រជាជនសរុបរបស់ខ្លួនគិតត្រឹមចុងឆ្នាំ២០២១ រីឯប្រទេសកំពុងអភិវឌ្ឍន៍នឹងអាចសម្រេចបានប្រហែល ៥៥%ប៉ុណ្ណោះ។

ស្រពេលជាមួយគ្នានោះដែរ វីរុសបំប្លែងថ្មីដែលកាន់តែសុំានិងកាន់តែងាយឆ្លង អាចនឹងប៉ះពាល់ខ្លាំងដល់ផលរំពឹងទុករបស់ការចាក់វ៉ាក់សាំងនេះ។

របាយការណ៍បន្តថា ការចាក់វ៉ាក់សាំងឱ្យបានលឿន គឺជាអាទិភាពសម្រាប់ប្រទេសដែលវិធានការទប់ស្កាត់កូវីដ១៩ មិនសូវមានប្រសិទ្ធភាព តួយ៉ាងដូចជាប្រទេសឥណ្ឌូណេស៊ី និងហ្វីលីពីនជាដើម។ ចិន និងវៀតណាម ដែលកំពុងខិតខំលុបបំបាត់កូវីដ១៩ ឱ្យមានប្រសិទ្ធភាព នៅមានលទ្ធភាពរៀបចំយុទ្ធសាស្រ្តសមស្របដើម្បីចាក់វ៉ាក់សាំងដល់ពលរដ្ឋរបស់គេ។

ដោយសារតែវ៉ាក់សាំងមិនមានបរិមាណគ្រប់គ្រាន់សម្រាប់ការបំបាត់ការឆ្លងវីរុសទាំងស្រុងឱ្យបានឆាប់ ធនាគារពិភពលោកបានជំរុញឱ្យរដ្ឋាភិបាលក្នុងតំបន់ ត្រូវតែបង្កើនវិធានការអន្តរាគមន៍មិនមែនឱសថសាស្រ្តថែមទៀត ជាពិសេសការធ្វើតេស្ត ការតាមការទាក់ទង និងការធ្វើចត្តាឡីស័ក ដែលជាវិធីមួយជួយពង្រីកឥទ្ធិពល និងប្រសិទ្ធភាពតម្លៃរបស់វ៉ាក់សាំងដែរ៕