នៅថ្ងៃទី២៩ ខែមីនា ឆ្នាំ​២០២១នេះ អង់គ្លេស​បាន​ដកការរឹតត្បិត​ដំណាក់កាលទី២ ពោលគឺ​អង់គ្លេស​បាន​បញ្ចប់​នូវ «ការស្នាក់នៅផ្ទះ» ហើយ​អនុញ្ញាតឱ្យមានការជួបជុំ​គ្នាដល់ ៦នាក់ ឬ២គ្រួសារ នៅទីសាធារណៈ ដូចជាសួនច្បារ និងឧទ្យាន​នានា។

សកម្មភាព​កីឡាផ្សេងៗ​ដូចជា តេននីស វាយកូនហ្គោល បាល់បោះ និងហែលទឹក ក៏ត្រូវបានអនុញ្ញាតឱ្យធ្វើឡើងវិញផងដែរ ដែល​នាយករដ្ឋមន្រ្តីអង់គ្លេស លោក Boris Johnson លើកឡើង​ថា វា​ជាការចាប់ផ្តើម​រដូវកាលកីឡារបស់អង់គ្លេស។

សូមរំលឹក​ថា កាលពីដំណាក់កាលទីមួយ ធ្វើឡើង​នៅថ្ងៃទី៨មីនា គឺអនុញ្ញាតឱ្យសិស្សចូលរៀនវិញ។ ការដកការរឹតត្បិត​ដំណាក់កាលទី៣ នឹងធ្វើឡើង​នៅថ្ងៃទី១២ ខែមេសា ដោយ​អង់គ្លេស​អនុញ្ញាតឱ្យមានការបើកហាងទូទៅឡើងវិញ ក្នុងនោះក៏មានហាងផឹកស៊ី និងហាងកាត់​សក់ និងកែសម្ផស្ស ព្រមទាំងសួនសត្វ សារមន្ទីរ បណ្ណាល័យ ហើយក៏អាចរៀបការបានផងដែរ។ ជារួម​អង់គ្លេស នឹងបើកប្រទេសវិញ​ទាំងស្រុង​នៅថ្ងៃទី២១ ខែមិថុនា ឆ្នាំ​២០២១។

លោក Boris Johnson បាន​ទទួលស្គាល់​ថា ការបើកប្រទេសឡើងវិញជាបណ្តើរៗនេះ​មានកត្តាមួយដ៏សំខាន់បំផុតនោះ គឺការចាក់វ៉ាក់សាំង​កូវីដ១៩ ខណៈ​នៅថ្ងៃចន្ទនេះ អង់គ្លេស​បាន​សម្រេចការចាក់វ៉ាក់សាំងឱ្យប្រជាជន​បាន​ប្រមាណ ៣០លានដូស ក្នុងនោះ ៥% នៃប្រជាជនសរុប បាន​ចាក់គ្រប់ ២ដូស និង៤៥% បានចាក់ដូសទីមួយ៕