ថវិកា ៦ម៉ឺនដុល្លារដែលប្រមូលពីការលក់ និងដេញថ្លៃផ្ទាំងគំនូរសិល្បករ ជា សិរី និង អាដាណា ម៉ម-ឡឺហ្គ្រោស ត្រូវបានយកទៅជួយដល់អង្កការ ៣ ដើម្បីបន្តសកម្មភាពជួយសហគមន និងប្រជាជនកម្ពុជា។

ថវិកា ៦ម៉ឺនដុល្លារត្រូវយកជួយដល់អង្គការ៣ អង្គការមនុស្សចាស់កម្ពុជា អង្គការធីភីអូកម្ពុជា និងអង្គការបុត្តាភិបាល​ដើម្បី​វឌ្ឍនសង្គមកម្ពុជា កាលពីថ្ងៃ ២៤ ខែមិនា ឆ្នាំ២០២១កន្លងទៅនេះគឺជាថវិកាមួយផ្នែកបានមកពីលក់ និងការដេញថ្លៃផ្ទាំងគំនូរ២០ផ្ទាំងរបស់វិចិត្រករនី២រូបគឺ លោកស្រី ជា សិរី និង កញ្ញា អាដាណា ម៉ម-ឡឺហ្គ្រោស ក្នុងកម្មវិធីតាំងពិព័រណ៍សប្បុរសធម៌ជាសាធារណៈរយៈពេលជិតពីរខែដែលឈ្មោះថា​ **«សិល្បៈនៃការចែករំលែក»** នៅសារមន្ទីរ ស.ស.រ និងលើបណ្តាញសង្គម។

សិល្បករសហសម័យ ជា សិរី បានលើកឡើងថា «ខ្ញុំពិតជាមានក្តីសោមនស្សរីករាយ ដែលបានឃើញភាពជោគជ័យនៃការ​តាំង​ពិព័រណ៍ “សិល្បៈនៃការចែករំលែក” និងការគាំទ្រដ៏លើសលុបពីបងប្អូនទាំងអស់គ្នា។ យើងផ្តួចផ្តើមការតាំង​ពិព័រណ៍នេះ​ឡើង ដើម្បីជាប្រយោជន៍ដល់សង្គមនិងបំផុសស្មារតីសាមគ្គីភាព ហើយខ្ញុំអាចនិយាយបានថា យើងសម្រេច​គ្រប់​គោលដៅ​ទាំងអស់ ទាំងការរៃអង្គាសថវិកា និងការចែករំលែកសាររបស់កម្មវិធីនេះ។ ខ្ញុំក៏សូមថ្លែងអំណរគុណយ៉ាងជ្រាលជ្រៅ​ចំពោះ​បងប្អូនពូមីងទាំងអស់ ដែលបានចូលមើលការតាំងពិព័រណ៍របស់យើងដោយផ្ទាល់ ឬលើបណ្តាញសង្គម បានជួយទិញគំនូរ​ឬវត្ថុអនុស្សាវរីយ៍ បានបរិច្ចាគជាថវិកា និងបានបង្ហាញការគាំទ្រចំពោះកម្មវិធីរបស់យើង»។

សិល្បករ អាដាណា ម៉ម-ឡឺហ្គ្រោស «ខ្ញុំមានក្តីរំភើបដោយបានឃើញបងប្អូន​គ្រប់គ្នាគាំទ្រ និង​ផ្តល់ក្តីស្រឡាញ់ចំពោះ​ការតាំងពិព័រណ៍ “សិល្បៈនៃការចែករំលែក” យ៉ាងច្រើនបែបនេះ។ វាជាសក្ខីភាពដែលបង្ហាញយ៉ាង​ច្បាស់ថា យើងអាចបង្កើតការផ្លាស់ប្តូរវិជ្ជមានជាច្រើន នៅពេលយើងរួមសាមគ្គីគ្នាដោយសុច្ឆន្ទៈ មិនថាកាលៈទេសៈលំបាក​យ៉ាងណា​ក៏ដោយ។ ថវិកាដែលរៃអង្គាសបានពីការលក់គំនូរ ជាដើម នឹងត្រូវប្រើប្រាស់ដើម្បីជួយគាំទ្រ​សកម្មភាពអង្គការ​ទទួលផល​ទាំងបី ដូចអ្វីដែលបានគ្រោងទុក។»

គួរបញ្ជាក់ថា​ ក្រៅពីតួនាទីជាន់ខ្ពស់ក្នុងសង្គមខ្មែរជាឧបការីទេសាភិបាល និងជាអគ្គនាយកបច្ចេកទេសនៃធនាគារជាតិនៃកម្ពុជា លោកស្រី ជា សេរី គឺជាវិចិត្រការនីម្នាក់ដែលល្បីក្នុងសង្គមសិល្បសហសម័យកម្ពុជាមួយរូបផងដែរ។ ស្នាដៃរបស់លោកជំទាវភាគច្រើនគឺត្រូវការតាំងនៅក្នុងសារមន្ទីរ​សេដ្ឋកិច្ច​និង​រូបិយ​វត្ថុ​ ព្រះ​ស្រី​ឦសាន​វរ្ម័ន ហៅកាត់​ ស.ស.រ និងមួយចំនួនត្រូវបាន អ្នកស្រឡាញ់ស្នាដៃសិល្ប:(Collector) មួយចំនួនជាវយក៕