ទើបចេញអនុក្រឹត្យម្សិលមិញ! ថ្ងៃនេះអភិបាលខេត្តព្រះសីហនុចេញវិធានការបិទខ្ទប់មុនគេបង្អស់
- 2021-04-01 02:37:58
- ចំនួនមតិ 0 | ចំនួនចែករំលែក 0
ទើបចេញអនុក្រឹត្យម្សិលមិញ! ថ្ងៃនេះអភិបាលខេត្តព្រះសីហនុចេញវិធានការបិទខ្ទប់មុនគេបង្អស់
ចន្លោះមិនឃើញ
នៅថ្ងៃទី១ ខែមេសា ឆ្នាំ២០២១នេះ លោក គួច ចំរើន អភិបាលនៃគណៈអភិបាលខេត្តព្រះសីហនុ បានចេញសេចក្តីជូនដំណឹងអំពីវិធានការបិទខ្ទប់ជាបណ្តោះអាសន្នចំពោះទីតាំងមួយផ្នែកនៃតំបន់ទំនប់រលក ដែលកំពុងមានការឆ្លងរាលដាលនៃជំងឺកូវីដ១៩ ស្ថិតនៅភូមិ៣ សង្កាត់លេខ១ ក្រុងព្រះសីហនុ។
ការបិទខ្ទប់តំបន់ទំនប់រលកមួយផ្នែក (ចាប់ពីក្រុមទី៦ ដល់ក្រុមទី១១ ក្រុមទី១៦ ដល់ក្រុមទី២៤ និងក្រុមទី៣២) ជាបន្ទាន់ ចាប់ពីមាត់សមុទ្រដល់ផ្លូវរថភ្លើង ដោយកំណត់បិទចាប់ពីមុខស្នាក់ការកងរាជអាវុធហត្ថទំនប់រលក រហូតដល់ផ្លូវឡើងទៅរោងចក្រ អរ ស៊ី អាយ (ទាំងសងខាងផ្លូវ) ដោយមិនអនុញ្ញាតឱ្យមានការចេញចូលតំបន់នោះបន្តទៀតឡើយ។
យ៉ាងណាក៏ដោយ ប្រជាពលរដ្ឋដែលរស់នៅក្នុងតំបន់នោះ អាចធ្វើដំណើរដោយថ្មើរជើងដើម្បីទិញម្ហូប សម្ភារប្រើប្រាស់ចាំបាច់ នៅផ្សារក្នុងភូមិ ដោយអ្នកលក់ និងអ្នកទិញ ត្រូវពាក់ម៉ាស់ បាញ់អាកុល ឬជែល សម្លាប់មេរោគ និងរក្សាគម្លាតសុវត្ថិភាព។
សូមជម្រាបថា ការចេញវិធានការខាងលើធ្វើឡើង១ថ្ងៃប៉ុណ្ណោះ បន្ទាប់ពីសម្តេចនាយករដ្ឋមន្រ្តី ហ៊ុន សែន អនុក្រឹត្យស្តីពីវិធានការរដ្ឋបាលដើម្បីទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត កាលពីថ្ងៃទី៣១ ខែមីនា ឆ្នាំ២០២១។
មាត្រា៩ នៃអនុក្រឹត្យនេះចែងថា៖ «រាល់ការធ្វើដំណើរចេញ-ចូលភូមិសាស្រ្តនៃតំបន់ ឬទីកន្លែងដែលត្រូវបានបិទខ្ទប់ អាចត្រូវបានហាមឃាត់លើកលែងតែការធ្វើដំណើរដើម្បីបំពេញមុខងារក្នុងការផ្តល់សេវាសង្គ្រោះបន្ទាន់ សេវាសាធារណៈចាំបាច់ និងបន្ទាន់ ឬសេវាដឹកជញ្ជូនទំនិញ និងករណីចាំបាច់ផ្សេងទៀតដោយមានការអនុញ្ញាតពីអាជ្ញាធរមានសមត្ថកិច្ច។
គួរបញ្ជាក់ថា ការដាក់ចេញវិធានការបិទខ្ទប់រាជធានី ឬខេត្ត និងការដាក់ចេញវិធានការរដ្ឋបាលផ្សេងទៀតដែលមានវិសាលភាពអនុវត្តលើសពីដែនដីនៃរាជធានី ឬខេត្តមួយ ឬមានវិសាលភាពអនុវត្តនៅទូទាំងប្រទេស ត្រូវធ្វើឡើងតាមសេចក្តីសម្រេចរបស់រាជរដ្ឋាភិបាល។
ចំណែកវិធានការរដ្ឋបាលណាមួយដែលមានវិសាលភាពអនុវត្តសម្រាប់ផ្នែកខ្លះ ឬទីកន្លែងខ្លះក្នុងដែនដីនៃរាជធានីខេត្ត ឬមានវិសាលភាពអនុវត្តទូទាំងរាជធានី ឬខេត្តរបស់ខ្លួនដែលមានការឆ្លងរាលដាលនៃជំងឺកូវីដ១៩ គឺត្រូវបានផ្តល់សមត្ថកិច្ចឱ្យគណៈអភិបាលរាជធានីខេត្ត ជាអ្នកសម្រេចដាក់ចេញ៕