កងទ័ព​ជើងទឹក​ឥណ្ឌូណេស៊ី បាន​នឹង​កំពុង​ស្វែងរក​នាវាមុជទឹក​១គ្រឿង​ដែល​មានផ្ទុកមនុស្ស ៥៣នាក់ បន្ទាប់ពី​បាត់ការទាក់ទង ក្នុងអំឡុងធ្វើសមយុទ្ធយោធា នៅសមុទ្រ Bali។

ក្រសួង​ការពារជាតិ​ឥណ្ឌូណេស៊ី ឱ្យដឹងថា នាវាមុជទឹក​នេះ ផលិតនៅប្រទេសអាល្លឺម៉ង់ មានឈ្មោះថា KRI Nanggala 402 ផលិតក្នុងឆ្នាំ​១៩៧៨ គ្រោង​ធ្វើលំហាត់​បាញ់​គ្រាប់​ពិត ចេញ​ពីក្រោមទឹក​នៅព្រឹកថ្ងៃពុធម្សិលមិញ។ ខណៈ​ពេល​ដែលវាកំពុងជ្រមុជចូលក្នុងទឹក ក៏ស្រាប់តែបាត់ការទាក់ទងតែម្តង។

ក្រសួង​បន្ថែម​ថា ឧទ្ធម្ភាគចក្រ​១គ្រឿង បាន​ស្វែង​រក​នាវាមុជទឹកនេះ នៅត្រង់ចំណុច​ដែលមាន​ប្រេងលេចធ្លាយអណ្តែត ដោយសន្និដ្ឋាន​ជាកន្លែង​ដែល​នាវាបាន​លិចបាត់ ក្រោមទឹកជម្រៅ ៧០០ម៉ែត្រ។

គួរដឹងថា ក្នុងបេសកកម្មរុករកនេះ ឥណ្ឌូណេស៊ី​បានប្រើប្រាស់​នាវាសង្គ្រាម ២គ្រឿង និងកងទ័ពប្រហែល ៤០០នាក់។ នាវាសង្គ្រាមទី៣ ក៏ត្រូវបាន​ចល័តចេញពីក្រុងហ្សាកាតា ទៅជួយរុករកផងដែរ៕