ស្ដេច​ថៃ​ធ្លាប់​មាន​បំណង​ចង់​គាស់​អង្គរវត្ត​ទៅ​ដាក់​នៅ​បាងកក តែ​មិន​បាន​សម្រេច​ព្រោះ...

  • 2021-05-04 06:40:14
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ប្រសិន​ស្ដេច​ថៃ​រាមា​ទី​៤ អាច​សម្រេច​គម្រោង​បម្លាស់​ទីតាំង​​​អង្គរវត្ត នោះ​បច្ចុប្បន្ន​ប្រាសាទ​បុរាណ​​ដ៏​អស្ចារ្យ​របស់​ជនជាតិ​ខ្មែរ​នឹង​ត្រូវ​ស្ថិត​នៅ​ជាប់​​ផ្សារ​ទំនើប CentralWorld នៃ​ទឹក​ដី​ទីក្រុង​បាងកក​មិន​ខាន។ នេះ​​បើ​យោង​តាម​សម្រង់​សម្ដី​របស់​អ្នក​​ប្រវត្តិ​វិទូ​ថៃ​គឺ​លោក Santi Pakdeekham ដែល​បាន​ចុះ​ផ្សាយ​នៅ​លើ​​ទំព័រ​សារព័ត៌មាន​ Khaosod កាល​ពី​ឆ្នាំ​២០១៨​កន្លង​ទៅ។

បើ​តាម​អ្នក​ជំនាញ​ផ្នែក​ប្រវត្តិ​វិទូ​ជំនាញ​ថៃ​និង​ខ្មែរ​នៃ​សកលវិទ្យាល័យ Sri Nakarinwiroj ​ដដែល​រូប​នេះ បាន​ឲ្យ​ដឹង​ថា គម្រោង​គាស់​យក​អង្គរវត្ត​​កើត​មាន​នៅ​ក្នុង​ឆ្នាំ​១៨៥៩ ដោយ​ស្ដេច​រាមាទី​៤ មាន​ព្រះ​នាម​ថា មង្គត់។ ហេតុការណ៍​នេះ​​បាន​កើត​ឡើង​មួយ​ឆ្នាំមុន​​​​ដែល​អ្នក​ធម្មជាតិ​វិទូ​បារាំង​គឺ​លោក Henri Mouhot បាន​ធ្វើ​ដំណើរ​រក​ឃើញ​​ប្រាសាទ​អង្គរវត្ត​សា​ជា​ថ្មី​ឡើង​វិញ។ "បំណង​របស់​ព្រះ​អង្គ​គឺ​រុះរើ​ប្រាសាទ​​មួយ​នេះ" នេះ​ជា​​ការ​ថ្លែង​របស់​លោក Santi។

ផ្អែក​​តាម​​បន្ទូល​ស្ដេច កង​ទ័ព​ថៃ​​ត្រូវ​ធ្វើ​​ដំណើរ​ទៅ​កាន់​អង្គរវត្ត និង​គាស់​យក​ផ្នែក​ខ្លះ​នៃ​ប្រាសាទ ដើម្បី​សាងសង់​ឡើង​វិញ​នៅ​លើ​​ទីតាំង​ថ្មី​ក្នុង​ទីក្រុង​បាងកក ដែល​​ឥលូវ​នេះ​​ទីតាំង​គ្រោង​ទុក​​នោះ​គឺ​​ស្ថិត​នៅ​ចំ​​​វត្ត Pathum។

លោក Santi បាន​​សង្កត់​បន្ថែម​ថា ស្ដេច​រាមា​ទី​៤ ក៏​​មាន​បំណង​ចង់​សង់​អង្គរវត្ត​ចម្លង​ថ្មី​មួយ​​ទៀត​ផង​ដែរ ដែល​ស្ថិត​នៅ​​ខេត្ត Phetchaburi។

ជា​សំណាង​មិន​ល្អ​សម្រាប់​ថៃ តែ​ជា​រឿង​ល្អ​បំផុត​គ្មាន​ពីរ​សម្រាប់​ខ្មែរ គម្រោង​គាស់​យក​អង្គរវត្ត​មិន​អាច​សម្រេច​ដូច​​​ការ​គិត​នោះ​ឡើយ។ បេសកកម្ម​របស់​ទ័ព​ថៃ​ត្រូវ​បរាជ័យ​ ដោយ​​ហេតុ​ថា​​ជនជាតិ​ខ្មែរ​ចេញ​ពី​ព្រៃ​​មាន​គ្នា​ប្រមាណ ៣០០​នាក់ បាន​លប​​វាយ​ប្រហារ​ ហើយ​បាន​​សម្លាប់​មេទ័ព​ថៃ​​​​​ឈ្មោះ Suphanphisarn និង​កូន​ប្រុស​របស់​​​គាត់​មួយ​រូប​ថែម​ទៀត​ផង។

ព្រោះ​គម្រោង​មិន​ជោគជ័យ ស្ដេច​រាមា​ទី​៤ បាន​ព្យាយាម​បង្កើត​បេសកកម្ម​​មួយ​​ទៀត ប៉ុន្តែ​ត្រូវ​បាន​​ក្រុម​ទីប្រឹក្សា​ព្រះ​អង្គ​​ផ្ដល់​យោបល់​ឲ្យ​បញ្ឈប់ ព្រោះ​យល់​ថា ការងារ​នេះ​មាន​ភាព​លំបាក​ខ្លាំង​ណាស់ ហើយ​ណា​មួយ​រចនាសម្ព័ន្ធ​ប្រាសាទ​សក្ដិសម​​សង់​នៅ​លើ​ទឹក​ដី​ខ្មែរ​ជាង។

ជំនួស​ឲ្យ​​គម្រោង​យក​អង្គរវត្ត​មកដាក់​លើ​ដី​ថៃ ស្ដេច​រាមា​ទី​៤ បាន​សម្រេច​សាងសង់​​អង្គរវត្ត​ចម្លង​​តូច​មួយ​វិញ​នៅ​ក្នុង​​បរិវេណ​វត្ត​ព្រះ​កែវមរកត នៅ​បាងកក។ ស្ដេច​រាមា​ទី​៤ មិន​អាច​មើល​ឃើញ​នូវ​ការ​បញ្ចប់​​​សំណង់​អង្គរវត្ត​ចម្លង​នោះ​ទេ ដោយ​ទ្រង់​បាន​ចូល​ទិវង្គត​​​មួយ​ឆ្នាំ​មុន​ប្រាសាទ​​ចម្លង​នេះ​បញ្ចប់​ការ​កសាង​នៅ​ក្នុង​ឆ្នាំ​១៨៦៨៕

ប្រភព៖ khaosod ប្រែ​សម្រួល៖ ឈាង.

;