ការ​សិក្សាពីការចាក់វ៉ាក់សាំង​នៅប្រទេសកូរ៉េខាងត្បូងបានបង្ហាញ​លទ្ធផលនៅថ្ងៃទី៥ឧសភានេះ​ថា ក្នុងចំណោមករណី​ឆ្លងកូវីដ១៩ចំនួន ១២៣៧នាក់ ក្នុងនោះអ្នកចាក់វ៉ាក់សាំងហើយឆ្លងគឺមានតែ ២៩នាក់តែប៉ុណ្ណោះ។

លទ្ធផល​នៃការសិក្សានេះ​ចេញផ្សាយ​ដោយ​ភ្នាក់ងារ​គ្រប់គ្រង​ និងទប់ស្កាត់​ជំងឺឆ្លងកូរ៉េ ដោយធ្វើការ​ផ្តោ​ទៅល់​មនុស្ស​ចាក់វ៉ាក់សាំងរួច​ជាង ៣,៥លាននាក់​ រយៈពេល២ខែ​គិតចាប់ពីចុងខែកុម្ភៈមក។

ការស្រាវជ្រាវឃើញ​ថា វ៉ាក់សាំង Pfizer មានប្រសិទ្ធភាព ៨៩,៧% ក្នុងការការពារ​មិនឱ្យឆ្លង រយៈពេល២សប្តាហ៍​បន្ទាប់ពីចាក់​ដូសទី១ ខណៈ AstraZeneca មានប្រសិទ្ធភាព ៨៦%។

ភ្នាក់ងារ​នេះ​បញ្ជាក់​ថា «វា៉ក់សាំងទាំងពីរ​ គឺ​ផ្តល់នូវ​ការបង្ការខ្ពស់​ពីការឆ្លងជំងឺ បន្ទាប់ពីចាក់ដូសទី១។ យ៉ាងណាក៏ដោយ ប្រជាជន​គួរតែ​ចាក់វ៉ាក់សាំង​ឱ្យបាន​គ្រប់ដូសតាមគម្រោង ព្រោះ​អត្រាការពារ​នឹងកើនឡើង​ថែមទៀត ក្រោយចាក់វ៉ាក់សាំង​ដូសទី២»។

គិតមកដល់ពេលនេះ កូរ៉េខាងត្បូង​បាន​ចាក់វ៉ាក់សាំងឱ្យប្រជាជនប្រមាណ ៦,៧% នៃប្រជាជន​សរុប ៥២លាននាកហើយ។ ប្រទេសនេះ មានគោលដៅ​ចាក់ឱ្យបាន ៧០% នៅខែកញ្ញា ហើយឈានដល់​ភាពសុំា​ក្នុងសហគមន៍​នៅខែវិច្ឆិកា៕