ផ្លូវក្រវាត់ក្រុងទី៣ ដែលមាន៤គន្លង សម្រេចការសាងសង់បានពាក់កណ្តាលហើយ
- 2021-05-12 07:08:11
- ចំនួនមតិ 0 | ចំនួនចែករំលែក 0
ផ្លូវក្រវាត់ក្រុងទី៣ ដែលមាន៤គន្លង សម្រេចការសាងសង់បានពាក់កណ្តាលហើយ
ចន្លោះមិនឃើញ
គម្រោងសាងសង់ផ្លូវក្រវាត់ក្រុងទី៣ ដែលភ្ជាប់ពីផ្លូវជាតិលេខ៤ ដល់ផ្លូវជាតិលេខ១ គឺសម្រេចបាន ៥០%ហើយ ក្រោយបើកការដ្ឋានសាងសង់កាលពីខែមករា ឆ្នាំ២០១៩។ បើគ្មានអ្វីប្រែប្រួលទេ គម្រោងនេះនឹងរួចរាល់នៅខែកញ្ញា ឆ្នាំ២០២២។ នេះបើតាមការឲ្យដឹងពីលោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន ដែលត្រូវបានដកស្រង់សម្តីដោយទូរទស្សន៍ PNN កាលពីថ្ងៃទី១១ ខែឧសភា ឆ្នាំ២០២១។
ផ្លូវក្រវាត់ក្រុងនេះចាប់ផ្តើមពីចំណុចផ្លូវជាតិលេខ៤ ត្រង់គីឡូម៉ែត្រ១៤+១០៥ ស្ថិតក្នុងភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ឆ្លងកាត់ផ្លូវជាតិលេខ៣ ផ្លូវជាតិលេខ២ ផ្លូវជាតិ លេខ២១ ផ្លូវជាតិលេខ២១A និងផ្លូវលេខ១១០ ឆ្ពោះទៅផ្លូវជាតិលេខ១ ត្រង់គីឡូម៉ែត្រលេខ២៤+១៤០ ស្ថិតក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល តភ្ជាប់ទៅកាន់ចំណតផែកុងតឺន័រថ្មីរបស់កំពង់ផែស្វ័យតភ្នំពេញឋិតនៅស្រុកកៀនស្វាយខេត្តកណ្ដាល ជាពិសេសកំណាត់ផ្លូវនេះតភ្ជាប់ផ្លូវ អាស៊ានហាយវេ AH1និងAH11 និងផ្លូវដែលជាច្រករបៀងសេដ្ឋកិច្ចសំខាន់ៗជាច្រើនទៀត។ គម្រោងនៃផ្លូវនេះ ក៏មានការសាងសង់ស្ពានអាកាសចំនួន៤ផងដែរ ឆ្លងកាត់ផ្លូវជាតិលេខ៤, លេខ៣, លេខ២ និងលេខ២១ ប្រវែងសរុប ១ពាន់ម៉ែត្រ។
ផ្លូវក្រវាត់ក្រុងទី៣ ត្រូវចំណាយការសាងសង់ប្រមាណ ២៧៣លានដុល្លារ ដែលជាហិរញ្ញប្បទានសម្បទានពីរដ្ឋាភិបាលចិន និងថវិកាបដិភាគរបស់រាជរដ្ឋាភិបាលកម្ពុជា៕