ក្រសួង​សុខាភិបាល​ប៉ាឡេស្ទីន ឱ្យដឹងថា ការវាយប្រហារ​តាមផ្លូវអាកាស​របស់​អ៊ីស្រាអែល ២លើក​នៅតំបន់​ហ្គាសា​ កាលពីថ្ងៃទី១៦ឧសភា​ម្សិលមិញ បាន​សម្លាប់ជនជាតិប៉ាឡេស្ទីន យ៉ាងហោច ៤៣នាក់ ក្នុងនោះ​កុមារ ៨នាក់ និងរបួស ៥០នាក់ ដែល​ភាគច្រើនជាស្រ្តី និងកុមារ។ នេះជាចំនួនស្លាប់​ច្រើនបំផុត​ បន្ទាប់ពីអ៊ីស្រាអែល​ចាប់​ផ្តើម​វាយប្រហារ​ចូល​តំបន់​ហ្គាសា សប្តាហ៍​នេះ។

ដោយឡែក​ខាងកងទ័ព​អ៊ីស្រាអែល បាន​អះអាងម្សិលមិញ​ដែរថា កងជីវពលហាម៉ាស់ បាន​បាញ់គ្រាប់​រ៉ុកកែត ១២០គ្រាប់ ក្នុងនោះ ១១គ្រាប់​ធ្លាក់​ចូល​តំបន់ហ្គាសា។

ជនស៊ីវិល​ដែលស្លាប់​នៅតំបន់​ហ្គាសា បានកើនឡើងដល់ ១៩៧នាក់ហើយ ក្នុងនោះ កុមារ ៥៨នាក់ និង​ស្រ្តី ៣៤នាក់ និងរបួសកើនដល់ ១២២៥នាក់។ ចំនួន​នេះ រំពឹងថា​នឹងកើនឡើងបន្តទៀត។

នាយករដ្ឋមន្រ្តី​អ៊ីស្រាអែល លោក បេនចាមីន នីតេនយ៉ាហ៊ូ បាន​បញ្ជាក់​ថា លោក​នឹងធ្វើគ្រប់បែបយ៉ាងទាំងអស់ ដើម្បី​ស្តារសណ្តាប់ធ្នាប់ឡើងវិញ ហើយ​វានឹង​ត្រូវ​ចំណាយពេល ពោលគឺលុះត្រាតែ​សន្តិសុខរបស់​ប្រជាជនអ៊ីស្រាអែល ត្រូវបានធានា។

លោក​ក៏បានអះអាងដែរថា អ៊ីស្រាអែល តែងតែព្យាយាម​បញ្ចៀស​នូវការស្លាប់របស់ជនស៊ីវិល ពីការវាយប្រហារ​តាមផ្លូវអាកាសរបស់ខ្លួន៕