លោក ស៊ី ជិនពីង ប្រធានាធិបតីចិន និង​លោក វ្លាឌីមៀ ពូទីន បាន​ធ្វើជាអធិបតី​ភាព​តាម​ប្រព័ន្ធវីដេអូ ក្នុង​ពិធី​បើកការដ្ឋាន​សាងសង់​រោងចក្រ​នុយក្លេអ៊ែរដែល​បំពាក់​បច្ចេកវិទ្យា​ទំនើប​ និងធំ​បំផុត​ កាលពីថ្ងៃទី១៩ ខែឧសភា ឆ្នាំ​២០២១។

ពិធីនេះ​ធ្វើឡើង​នៅ​រោងចក្រ​ថាមពល​នុយក្លេអ៊ែរ Tianwan ក្នុង​ខេត្ត Jiangsu និង​រោងចក្រ Xdapu ក្នុងខេត្ត Liaoning។ បើបូក​ចូលគ្នា គឺ​អាច​ផលិតថាមពល​បាន ៣៧,៦ពាន់លានគីឡូវ៉ាត់ម៉ោង ក្នុង១ឆ្នាំ។ គម្រោងនេះ គ្រោងនឹងបញ្ចប់នៅឆ្នាំ​២០២៦ និង ២០២៨ ដែល​នឹងជួយធានាដល់សន្តិសុខថាមពលរបស់ចិន។

លោក ស៊ី ជិនពីង បាន​ថ្លែងថា ប្រទេសទាំងពីរ​គួតែជំរុញ​កិច្ចសហប្រតិបត្តិការ​បច្ចេកវិទ្យា និង​វិទ្យាសាស្រ្ត​អំពី​ថាមពលនុយក្លេអ៊ែរ​បន្ថែម​ ដោយ​សង្កត់ធ្ងន់ទៅលើការច្នៃប្រឌិត។

ចំណែក​លោក ពូទីន ថ្លែងថា កិច្ចព្រមព្រៀង​ទាំងអស់​រវាង​រុស្ស៊ី និងចិន បាន​ឈាន​ដល់​កម្រិត​កំពូល និងកំពុងត្រូវបាន​អនុវត្ត។ លោកយល់ឃើញ​ថា កិច្ចសហប្រតិបត្តិការ​ក្នុងការអភិវឌ្ឍ​នុយក្លេអ៊ែរ​ដោយសន្តិភាព គឺ​ជាគោលការណ៍​ដ៏សំខាន់មួយ​នៃ​ភាពជាដៃគូយុទ្ធសាស្រ្តរវាងប្រទេសទាំង២៕