ជាង ២០ឆ្នាំមុនតារាកំប្លែង កៅអៀក បាត់បង់ជីវិតក្នុងហេតុការណ៍ដ៏អាក្រក់មិនធ្លាប់មានក្នុងសង្គមសិល្បៈ!

2021-05-25 03:00:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គិតមកដល់ពេលនេះមានរយៈពេល ២៥ឆ្នាំហើយ ដែលតារាកំប្លែងដ៏ល្បី មានឈ្មោះក្នុងសិល្បៈថា "កៅអៀក" បានបាត់បង់ជីវិត ក្រោយពីបានជួបហេតុការណ៍ដ៏អាក្រក់ធ្លាក់ឧទ្ធម្ភាគចក្រនៅក្នុងទឹកដីខេត្តកំពង់ឆ្នាំង។

នោះជាហេតុការណ៍ដ៏អាក្រក់ និងតក់ស្លុតបំផុតក្នុងសង្គមសិល្បៈខ្មែរ ដោយបានឆក់យកអាយុជីវិតសិល្បករ និងអ្នកដំណើរមួយចំនួនទៀត។ តាមឆាណែល PSY News បានឲ្យដឹងថា ហេតុការណ៍នោះបានកើតឡើងនៅព្រឹកថ្ងៃអាទិត្យ ទី២៥ សីហា ឆ្នាំ ១៩៩៦។ កាលណោះ តារាកំប្លែងដ៏ល្បីកាលនោះ គឺអ្នកនាង កៅអៀក មានបេសកកម្មដោយត្រូវទៅចូលរួមសម្ដែងក្នុងកម្មវិធីបង្កក់កូនរបស់មន្ត្រីយោធាជាន់ខ្ពស់មួយរូបនៅក្នុងខេត្តស្ទឹងត្រែង។

ដោយសារដំណើរវែងឆ្ងាយ កៅអៀក និងក្រុមការងារ បានធ្វើដំណើរតាមឧទ្ធម្ភាគចក្រ ប៉ុន្តែមិនទាន់បានទៅដល់គោលដៅផង ក៏ជួបហេតុការណ៍រហូតដល់បាត់បង់ជីវិត។ តាមលោក សោម សុខុម អ្នកដំណើរម្នាក់ក្នុងចំណោមអ្នករស់រានមួយចំនួនទៀតពីហេតុការណ៍នឹកស្មានមិនដល់នេះ បានប្រាប់ឲ្យដឹងថា នៅលើឧទ្ធម្ភាគចក្រមានអ្នកដំណើរសរុបជាង ២០នាក់ ក្នុងនោះមានក្មេងអាយុប្រមាណ ១០ឆ្នាំ២ ៣នាក់ផង។

សាក្សីដដែល ជាអ្នកអង្គុយជិតនឹងតារាកំប្លែង កៅអៀក និងច្បាស់ពីហេតុការណ៍បានរៀបរាប់ឲ្យដឹងទៀតថា នៅពេលនោះ ខណៈពេលដែលឧទ្ធម្ភាគចក្រកំពុងតែហោះហើរសុខៗ ស្រាប់តែម៉ាស៊ីនមានបញ្ហា ធ្វើឲ្យគាំងដំណើរការភ្លាមៗ។ រំពេចនោះ ឧទ្ធម្ភាគចក្រក៏បានធ្លាក់ចុះមកដីតែម្ដង ដោយធ្លាក់ចូលទៅក្នុងតំបន់ព្រៃស្បាតក្រាស់ ក្បែរភ្នំជីស្ថិតក្នុងភូមិសាស្ត្រទឹកដីខេត្តកំពង់ធំ។ វេលានោះ គ្មាននរណាអាចជួយអ្នកណាបានឡើយ ដោយម្នាក់ៗរងរបួសស្រាល ធ្ងន់រៀងខ្លួន។

អ្នកនាង កៅអៀក បានខ្ទាតទៅបោកនឹងជញ្ជាំងឧទ្ធម្ភាគចក្រម្ខាង។ ជាមួយគ្នា កានធុងសាំងចំណុះ ៣០លីត្រ និងមានចំនួនប្រមាណជា ៣០ កាន ដែលមាននៅលើឧទ្ធម្ភាគចក្រ មួយចំនួនបានដួលបោក និងសង្កត់ទៅលើតារាកំប្លែង។ ដោយសារអ្នកនាង កៅអៀក មានមាឌតូចល្អិតផង ផ្សំនឹងការបោកផ្ទប់ជាមួយនឹងការធ្លាក់ចុះនៃឧទ្ធម្ភាគចក្រ និងសង្កត់ដោយធុងសាំងផង តារាកំប្លែងអភ័ព្វក៏បានដាច់ខ្យល់ស្លាប់ក្នុងវេលានោះទៅ ដោយមិនបានពោលពាក្យលា ឬផ្ដាំផ្ញើនរណាម្នាក់មួយម៉ាត់ណាឡើយ។

ក្រោយកើតហេតុ ដោយសារទីកន្លែងកើតហេតុស្ថិតក្នុងក្នុងតំបន់មានព្រៃក្រាស់ ក្រុមគ្រួសារមិនអាចនាំយកសពតារាកំប្លែងមាឌល្អិតមកធ្វើបានឡើយ។ លោក ឃុន រតនៈ ជាស្វាមី បានប្រាប់សារព័ត៌មានឲ្យដឹងថា ក្រុមគ្រួសារ បានសម្រេចធ្វើបុណ្យសពដោយមិនមាន សាកសព និងអដ្ឋិធាតុ។ ទិដ្ឋភាពនោះ មិត្តរួមអាជីព មាននាយ ជ្រុញ ជាដើម បានពោលពាក្យសោកស្ដាយ និងអាណិតអាសូរ កៅអៀក ជាពន់ពេក មិនគួរណាមានភ័ព្វអាក្រក់យ៉ាងនេះទាល់តែសោះ។

អ្នកនាង កៅអៀក បាត់បង់ជីវិតនៅអាយុ ៤០ ឆ្នាំគត់ ហើយបានបន្សល់ទុកនូវកូនស្រីតែម្នាក់គត់ដែលជាកូនប្ដីមុន ដែលពេលនោះនាងទើបមានអាយុ ១៤ឆ្នាំ ដែលបើគិតមកដល់ពេលនេះ កូនស្រីរូបនេះ មានអាយុក្បែរ ៤០ឆ្នាំដែរ ប៉ុន្តែគេមិនដឹងថា នាងរស់នៅទីណា និងស្ថានភាពយ៉ាងណានោះឡើយ៕