លោក លី ស៊ានឡុង នាយករដ្ឋមន្រ្តីសិង្ហបុរី បានថ្លែងនៅថ្ងៃទី៣១ ខែឧសភា ឆ្នាំ​២០២១ថា សិង្ហបុរី ត្រូវតែត្រៀមខ្លួនរស់នៅជាមួយជំងឺកូវីដ១៩ ដោយ​លើកឡើងថា ជំងឺនេះ​នឹងមិនរលាយបាត់ឡើយ វានឹងនៅជាមួយពិភពលោក​ជាច្រើនឆ្នាំទៀត។

យ៉ាងណាមិញ ទោះជាកូវីដ១៩ មិនរលាយបាត់ក៏ដោយ តែលោកបញ្ជាក់​ថា ប្រជាជន​សិង្ហបុរី នឹងទទួលបានការវ៉ាក់សាំង​ជារៀងរាល់ឆ្នាំ ហើយបន្ថែម​ការធ្វើតេស្តរកកូវីដ១៩ ជាញឹកញាប់ ដោយសារតែ​ឥឡូវការធ្វើតេស្តគឺរហ័ស និងងាយស្រួល។

ក្នុងន័យនេះ លោក លី ស៊ានឡុង អះអាងថា ប្រជាជនសិង្ហបុរី នឹង​អាចចេញទៅធ្វើការ ឬទៅសាលារៀន ជួបមិត្តភក្តិ​ក្រុមគ្រួសារ ចូលរួមពិធីសាសនា និង​ចូលទស្សនាព្រឹត្តិការណ៍កីឡា និង​ការកម្សាន្តនានា ដូចធម្មតា។

លោកនាយករដ្ឋមន្រ្តី​បន្តថា៖ «យើង​នឹង​បើក​ព្រំដែន​របស់យើង​ដោយសុវត្ថិភាព​ឡើងវិញ។ ភ្ញៀវ​នឹងមកសិង្ហបុរី​ម្តងទៀត។ ប្រជាជនសិង្ហបុរី នឹងធ្វើដំណើរទៅប្រទេសនានា​ដែលគ្រប់គ្រងជំងឺនេះបានល្អប្រសើរ ជាពិសេស​នៅពេលយើងចាក់វ៉ាក់សាំងបានរួចរាល់»។

លើសពីនេះ លោកលើកឡើងទៀតថា ប្រជាជន​នឹង​ចេញទៅទីសាធារណៈ ដោយមិនចាំបាច់​ពាក់ម៉ាសទៀតឡើយ។

បើតាម​លោក លី ស៊ានឡុង ឱ្យដឹងថា សិង្ហបុរី នឹង​ដកការរឹតត្បិត​ក្រោយថ្ងៃទី១៣មិថុនាខាងមុខ ខណៈស្ថានភាពកូវីដ១៩នៅក្នុងប្រទេស​នេះ កាន់តែល្អប្រសើរ៕