តុលាការរៀបរាប់ហូរហែថា ចម្លើយឧកញ៉ារងគ្រោះមិនច្បាស់លាស់ ទីបំផុតសម្រេចទម្លាក់បទចោទលើពិធីការិនីហើយ!

2021-06-09 05:17:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្ដីក្ដាំរវាងពិធីការិនី មាន ពេជ្ររីតា ហៅយូប៊ី ជាមួយលោកឧកញ៉ា ហេង សៀ ដែលស្ងប់ស្ងាត់មួយរយៈធំដោយអ្នកខ្លះគិតថាសំណុំរឿងនេះបានបិទបញ្ចប់ទៅដោយស្ងាត់ៗទៅហើយ។ ប៉ុន្តែនៅថ្ងៃទី៩ ខែមិថុនា ឆ្នាំ២០២១ នេះ ស្រាប់តែតុលាការចេញសេចក្ដីសម្រេចទម្លាក់ចោលបទចោទលើកញ្ញា មាន ពេជ្ររីតា។

សេចក្ដីសម្រេចរបស់ចៅក្រមស៊ើបសួរ នៃសាលាដំបូងរាជធានីភ្នំពេញកម្រាស់៦ទំព័រដោយមានសំអាងហេតុជាច្រើន ចំណុច ដើម្បីឈានដល់ការដោះបន្ទុកលើកញ្ញា មាន ពេជ្ររីតា ដែលដំបូងឡើងត្រូវបានតំណាងអយ្យការចោទពីបទ "លួចមានស្ថានទម្ងន់ទោស" ប៉ុន្តែក្នុងនោះ ខ្លឹមសាររួមបានលើកឡើងថា ចម្លើយរបស់អ្នករងគ្រោះដាក់បន្ទុកទៅលើពិធីការិនីត្រូវចោទ មានភាពមិនច្បាស់លាស់។ ផ្ទុយទៅវិញ ចម្លើយរបស់ជនត្រូវចោទ មានភាពស៊ីសង្វាក់គ្នាទៅនឹងអង្គហេតុច្រើនជាង។

ចៅក្រមស៊ើបសួរ លោក កូយ សៅ បានលើកសេចក្ដីសន្និដ្ឋានមួយថា ការយកកាំបិតចុងស្រួចចេញពីកាបូបមកគ្រវាសចុះឡើង ឬចាក់លើជនរងគ្រោះ គឺជាការការពារខ្លួនក្នុងសភាពចាំបាច់ និងមានតុល្យភាព ដើម្បីរំដោះខ្លួនចេញពីអំពើឈ្លានពានមួយដែលមិនត្រឹមត្រូវ។ តុលាការក៏សម្រេចប្រគល់ទូរស័ព្ទ IPhone 11 Pro max ពណ៌ទឹកមាសបែកអេក្រង់(មិនប្រក្រតី) ឱ្យទៅ ម្ចាស់ដើម ឈ្មោះ ហេង សៀ វិញ។ រីឯកូនកាំបិតចុងស្រួច ដងពណ៌ខ្មៅដែលជាវត្ថុតាងនោះ ត្រូវបានតុលាការរឹបអូសយក ដោយយើងលើក្រមនីតិវិធីព្រះទណ្ឌ។

សូមរំលឹកថា ក្ដីក្ដាំរវាងកញ្ញា មាន ពេជ្ររីតា និងឧកញ៉ា ហេង សៀរ បានកើតឡើងក្រោយបែកធ្លាយនូវទំនាក់ទំនងស្នេហាលួចលាក់មួយ។ ភ្លាមៗនោះលោកឧកញ្ញា បានប្ដឹងពិធីការិនីរូបនេះពីបទ"លួចទូរស័ព្ទដៃ ដោយហិង្សា។ ក្រោយមកទៀតកញ្ញា មាន ពេជ្ររីតា ក៏ប្ដឹងបកវិញពីបទ"បៀតបៀនកេរខ្មាស"៕

អត្ថបទ៖ ជិន សុភ័ក្ដ្រ