សម្តេច​នាយករដ្ឋមន្រ្តី ហ៊ុន សែន បានបញ្ចេញ​សារជាសំឡេងបន្ទាន់យប់មិញ ដោយ​បញ្ជាឱ្យអភិបាល​រាជធានីខេត្តលុបចោលគម្រោងប្រមូលផ្តុំមនុស្ស​រៀនសូត្របោះឆ្នោតសាកល្បង​ជ្រើសរើសក្រុមប្រឹក្សាឃុំសង្កាត់ និង​បានស្នើឱ្យ​គណៈកម្មាធិការជាតិរៀបចំការបោះឆ្នោត (គ.ជ.ប) លុបចោល​ការបោះឆ្នោតសាកល្បងនេះផងដែរ ដោយលើកឡើងថា គ.ជ.ប ត្រូវយល់ពីការលំបាករបស់​រាជរដ្ឋាភិបាល ក្នុងស្ថានភាព​ឆ្លងរាលដាលនៃជំងឺកូវីដ១៩។

សម្តេចតេជោ បានលើកឡើង​យ៉ាងដូច្នេះថា៖ «ពេលវេលានេះ សូម្បីតែគណៈកម្មាធិការជាតិរៀបចំការបោះឆ្នោត ក៏ត្រូវតែចូលរួមដើម្បីប្រយុទ្ធប្រឆាំងជាមួយកូវីដ១៩។ ការប្រមូលប្រជាជនណាមួយ​មកជួបជុំ ដើម្បីហ្វឹកហាត់​សម្រាប់​ការបោះឆ្នោតសាកល្បង គឺគ្មានការចាំបាច់នោះទេ»។

សម្តេចបន្តថា៖ «យើងគោរពទៅដល់​ឯករាជ្យភាព​របស់​គណៈកម្មាធិការជាតិរៀបចំការបោះឆ្នោត តែ គណៈកម្មាធិការជាតិរៀបចំការបោះឆ្នោត ក៏ត្រូវតែយល់កិច្ចការដ៏លំបាករបស់អង្គនីតិប្រតិបត្តិ និងអាជ្ញាធរគ្រប់លំដាប់ថ្នាក់ផងដែរ ក៏ដូចជាការយល់ដល់ការលំបាក​របស់​ប្រជាពលរដ្ឋ ដែល​កំពុងតែរង​សម្ពាធនៃការវ៉ៃលុកនៃកូវីដ១៩ ក៏ដូចជាខិតខំស្តារឡើងវិញនូវជីវភាព សេដ្ឋកិច្ចសង្គម»។

សូមជម្រាបថា ចំពោះសំណើរបស់​សម្តេច ហ៊ុន សែន គឺត្រូវបាន គ.ជ.ប យល់ព្រម​ ដោយ​សម្រេចលុបចោល​ការអនុវត្ត​ការបោះឆ្នោត​សាកល្បង​ជ្រើសរើស​ក្រុមប្រឹក្សាឃុំ សង្កាត់ ឆ្នាំ២០២១ ដែលគ្រោងនឹង​ធ្វើឡើង​នៅថ្ងៃទី២០ ខែមិថុនា ឆ្នាំ២០២១ នៅក្នុងឃុំ សង្កាត់​គោលដៅចំនួន ២៥ នៃរាជធានីខេត្ត​ទាំងអស់​ទូទាំងប្រទេស៕