គ្រូ​ពេទ្យ​ជាង ៣៥០នាក់​នៅក្នុងប្រទេស​ឥណ្ឌូណេស៊ី បាន​ឆ្លងកូវីដ១៩ បើទោះ​បីជាបានចាក់វ៉ាក់សាំង Sinovac គ្រប់២ដូស​រួចមកហើយ ក្នុងនោះ​រាប់សិប​នាក់​ត្រូវបាន​បញ្ជូនទៅព្យាបាល​នៅមន្ទីរពេទ្យ។ ស្ថានភាពនេះ ធ្វើឱ្យគេបារម្ភពីប្រសិទ្ធភាព​របស់ Sinovac ក្នុងការការពារពីវីរុសបម្លែងថ្មី។

លោកបណ្ឌិត Badai Ismoyo ប្រធាន​ការិយាល័យ​សុខាភិបាលស្រុក Kudus នៅ​កោះជ្វា បាន​និយាយថា គ្រូពេទ្យ​ភាគច្រើន​បានចេញ​រោគសញ្ញា និង​ដាក់ខ្លួននៅដាច់ដោយឡែក​ក្នុងផ្ទះ ប៉ុន្តែក៏មានច្រើននាក់ដែលត្រូវបញ្ជូនទៅមន្ទីរពេទ្យដោយសារ​ក្តៅខ្លួនខ្លាំង និង​ខ្វះអុកស៊ីហ្សែន។

ស្រុក Kudus ដែល​ជាកន្លែងផ្ទុះកូវីដ១៩ខ្លាំង ត្រូវបាន​ជឿជាក់ថា ភាគច្រើន​នៃការឆ្លងគឺជាវីរុស Delta (មានប្រភពនៅ​ឥណ្ឌា)។

គ្រូ​ពេទ្យទាំងនេះ សុទ្ធតែទទួលបាន​អាទិភាព​ក្នុងការចាក់វ៉ាក់សាំង Sinovac ក្នុងពេលបើកយុទ្ធនាការ​ចាក់វ៉ាក់សាំង​ថ្នាក់ជាតិ កាលពីខែមករា ឆ្នាំ២០២១។

កាលពី​ខែមុន រដ្ឋមន្រ្តី​សុខាភិបាលឥណ្ឌូណេស៊ី បាន​បញ្ជាក់ពី​ប្រសិទ្ធភាព​វ៉ាក់សាំង Sinovac ដោយ​សិក្សា​ទៅលើបុគ្គលិកពេទ្យ​ ២៥ ៣៧៤នាក់ ក្រោយ​ចាក់លើកទី២ រយៈពេល ២៨ថ្ងៃ បង្ហាញថា វ៉ាក់សាំងនេះ​មានប្រសិទ្ធភាព​ ១០០% ការពារមិនឱ្យស្លាប់ដោយសារ​ជំងឺកូវីដ១៩ និង​ប្រសិទ្ធភាព ៩៦% មិនចាំបាច់​ចូលមន្ទីរពេទ្យព្យាបាល​ទោះឆ្លងក៏ដោយ។ លោក​និយាយថា ៩៤% នៃ​បុគ្គលិក​ពេទ្យ​ទាំងនេះ គឺ​ត្រូវបានការពារ​ពោលគឺ​ភាពសុំា ពីការ​ឆ្លងមេរោគនេះ ដែល​ជាលទ្ធផលដ៏​អស្ចារ្យមួយ​ហួសពីអ្វី​ដែល​បាន​រំពឹងទុក ក្នុងអំឡុងការ​ចាក់សាកល្បងគ្លីនីក​កន្លងទៅ។

យ៉ាងណាមិញ លោក​មិនទាន់អាចបញ្ជាក់​នៅឡើយថាតើ​វ៉ាក់សាំង Sinovac អាច​ការពារ​ការឆ្លងវីរុសបម្លែងថ្មីយ៉ាងណានោះទេ ដោយលោក​គ្រាន់តែលើកឡើងថា ឥណ្ឌូណេស៊ីមិនទាន់មានការផ្ទុះករណីឆ្លងវីរុសបម្លែងថ្មីទ្រង់ទ្រាយធំនោះទេ៕