ប្រធានាធិបតីហៃទី ត្រូវបានគេលបធ្វើឃាតផ្តាច់ជីវិត
- 2021-07-08 03:30:22
- ចំនួនមតិ 0 | ចំនួនចែករំលែក 0
ប្រធានាធិបតីហៃទី ត្រូវបានគេលបធ្វើឃាតផ្តាច់ជីវិត
ចន្លោះមិនឃើញ
លោក Jovenel Moise ប្រធានាធិបតិនៃប្រទេសហៃទី វ័យ៥៣ឆ្នាំ ត្រូវបានគេលបបាញ់សម្លាប់ នៅផ្ទះរបស់លោក នាថ្ងៃទី៧ កក្កដា ២០២១។ ភរិយារបស់លោក ក៏ត្រូវគ្រាប់ដែរ ហើយត្រូវបញ្ជូនទៅមន្ទីរពេទ្យ ដោយមានស្ថានភាពធ្ងន់ធ្ងរ ប៉ុន្តែមិនប៉ះពាល់ដល់ជីវិតទេ។
ឯកអគ្គរដ្ឋទូតហៃទីប្រចាំសហរដ្ឋអាមេរិក លោក Bocchit Edmond ឱ្យដឹងថា ប៉ូលិសហៃទី បានឃុំខ្លួនជនសង្ស័យ២នាក់ និងបានសម្លាប់មនុស្ស ៤នាក់ដែលពាក់ព័ន្ធនឹងការធ្វើឃាតនេះ។ «យើងកំពុងរង់ចាំមើលថាតើយើងអាចកំណត់បាននរណាខ្លះដែលចូលរួមក្នុងសកម្មភាពដ៏រន្ធត់នេះ»។
លោកឯកអគ្គរដ្ឋទូត អះអាងថា ជនសង្ស័យដែលត្រូវបានបាញ់សម្លាប់ និងចាប់ខ្លួន គឺជាជនបរទេស ហើយប៉ូលិសកំពុងតែកំណត់អត្តសញ្ញាណថាពួកគេជាជនជាតិអ្វី។ លោកជឿជាក់ថា ជនសង្ស័យបានទទួលជំនួយពីក្រុមជាតិនិយមហៃទី ដោយបានកត់សម្គាល់ពីរថយន្តដែលជនសង្ស័យប្រើប្រាស់ សម្រាប់ជិះទៅសម្លាប់ប្រធានាធិបតី។
គួរដឹងថា នៅដើមឆ្នាំ២០២១នេះ មានការផ្ទុះបាតុកម្មដ៏ធំនៅទូទាំងប្រទេសហៃទី បន្ទាប់ពីប្រធានាធិបតី Moise ច្រានចោលដីការតុលាការដែលថាអាណត្តិរបស់លោកបានបញ្ចប់ ដោយអះអាងថា លោកសល់ពេល១ឆ្នាំទៀត៕