ឥណ្ឌូណេស៊ី បាន​វ៉ាដាច់​ឥណ្ឌា ដែល​មានករណីឆ្លងកូវីដ១៩ ខ្ពស់​ជាងគេ​បំផុត​ប្រចាំថ្ងៃ ធ្វើឱ្យ​ប្រទេស​អាស៊ានមួយនេះ ក្លាយ​ជា​ចំណុច​ផ្ទុះការឆ្លងថ្មី។

ឥណ្ឌូណេស៊ី បាន​រកឃើញ​ករណីឆ្លងលើសពី៤ម៉ឺននាក់ រយៈពេល២ថ្ងៃជាប់ៗគ្នាហើយ ក្នុងនោះ​កាលពីថ្ងៃទី១៣ កក្កដា មានចំនួន ៤៧ ៨៩៩នាក់ ដែល​ជាចំនួន​ខ្ពស់បំផុត។ មន្រ្តី​បារម្ភ​ថា ការចម្លងនៃ​វីរុសបម្លែងថ្មី​ បាន​រាលដាល​ចេញពីកោះជា្វ​ ទៅកាន់​បណ្តាតំបន់នានា ជាហេតុ​ធ្វើឱ្យបុគ្គលិកពេទ្យ​ជួបការលំបាកខ្លាំង​ និង​ខ្វះអុកស៊ីហ្សែន។

ជាមួយគ្នា​នេះ ចំនួន​អ្នកស្លាប់​ដោយសារ​កូវីដ១៩​ប្រចាំថ្ងៃ​ក្នុងប្រទេស​ឥណ្ឌូណេស៊ី បានកើនឡើងដល់ជាង៩០០នាក់ ក្នុងរយៈពេល ៧ថ្ងៃចុងក្រោយនេះ បើប្រៀបធៀបនឹង​ឥណ្ឌា ដែល​មានអ្នកស្លាប់ជាង ១ពាន់នាក់។

គិតមកដល់ពេលនេះ ឥណ្ឌូណេស៊ី មានករណីឆ្លងកូវីដ១៩សរុបជាង ២,៦៧លាននាក់ ក្នុងនោះស្លាប់ជាង ៦ម៉ឺន ៩ពាន់នាក់ និងជាសះស្បើយជាង ២,១៥លាននាក់៕