ទីផ្សារសិល្បៈមានរហូតសម្រាប់ ឌីជេ កាកា ទោះបីមានបញ្ហាកូវីដ ឥឡូវបែរជាបង្ហាញខ្លួនដឹកអីវ៉ាន់តាមផ្ទះវិញ

2021-07-20 04:37:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ឌីជេ កាកា អាចចាត់ទុកថាជាតារាសម្ដែងបែបកំប្លែងជួរមុខមុខរបស់កម្ពុជា ពោលគឺស្ថិតនៅលំដាប់ ឬក្នុងចង្កោមតារាកំប្លែងល្បីៗដូចជានាយគ្រឿន និងនាយពាក់មីជាដើម ព្រោះគេសង្កេតឃើញថាបើទោះបីជាកម្ពុជាវាយលុកដោយជំងឺកូវីដ-១៩ អស់រយៈពេលជាង២ឆ្នាំ ប៉ុន្តែតារាសម្ដែងរូបនេះនៅតែមានទីផ្សារការងារសិល្បៈគ្រាន់បើ។

មានប្រភពខ្លះបង្ហើបថា ឌីជេ កាកា មានជីវភាពល្អប្រសើរ ហើយថែមទាំងមានឡានជិះទៀតផង។ ប៉ុន្តែមហាជន ជាពិសេសអ្នកគាំទ្រលោកមួយចំនួនមានការភ្ញាក់ផ្អើល និងសង្វេគក្នុងចិត្តអាណិតតារារូបនេះទៅវិញ ក្រោយពីបានឃើញរូបថត១សន្លឹកដែលបង្ហោះដោយលោកផ្ទាល់កាលពីថ្ងៃ១៩ ខែកក្កដា ឆ្នាំ២០២១។ រូបនោះ គេឃើញលោកស្ថិតនៅក្នុងស្ថានភាពតោកយ៉ាក ជិះម៉ូតូតែម្នាក់ឯង ដោយធ្លាក់ខ្លួនដឹកអីវ៉ាន់ដើរដាក់តាមផ្ទះរបស់ក្រុមហ៊ុនដឹកជញ្ជូនវីរៈ ប៊ុនថាំ។

គិតចាប់ពីពេលដែលលោកបង្ហោះសារ ដោយមានភ្ជាប់រូបភាពដ៏គួរឲ្យភ្ញាក់ផ្អើលនេះ រហូតដល់ម៉ោង១១ព្រឹកថ្ងៃទី២០ ខែកក្កដា នេះ Sabay មិនទាន់អាចសុំការបញ្ជាក់ពីតារារូបនេះបាននៅឡើយទេ ថាតើនេះគឺស្ថានភាពជីវភាពពិតប្រាកដរបស់លោកបច្ចុប្បន្ន ឬគ្រាន់តែជារូបថតក្នុងឈុតឆាកសម្ដែងក្នុងរឿងណាមួយទេ? ប៉ុន្ដែភ្ជាប់ជាមួយរូបថតនោះ លោកបានសរសេរថា៖"ស៊ូៗដើម្បីជីវិតពេលឥឡូវនេះ"។

ទោះជាយ៉ាងណា តាមរយៈComentជាច្រើននៅលើរូបភាពដែលបានបង្ហោះនោះ មានអ្នកគាំទ្រតិចណាស់ដែលជឿថានេះជាស្ថានភាពពិតប្រាកដរបស់ឌីជេ កាកា។ ពួកគេសន្និដ្ឋានថា វាគ្រាន់តែជាឈុតសម្ដែងមួយប៉ុណ្ណោះ។ អ្នកគាំទ្រម្នាក់ចូលទៅសរសេរថា៖"បងសម្ដែងឈុតដឹកស្រោមឲ្យថៅកែប្រុស តែច្រឡំយកឲ្យថៅកែស្រីនៅផ្ទះ"។ ឌីជេ កាកា ក៏ឆ្លើយតបភ្លាមថា"ដឹងម៉េស?" ហើយម្ចាស់ចម្លើយនោះក៏ឆ្លើយវិញថា៖"សាកទាយតើបង បើឈុតអីចឹងមែនសើចម៉េចទៅ"៕

អត្ថបទ៖ ជិន សុភ័ក្ដ្រ