រដ្ឋាភិបាលជប៉ុន កំពុងស្ថិតក្នុងការចរចា​ដំណាក់កាលចុងក្រោយ​ដោយបើកផ្លូវឱ្យក្រុមហ៊ុន IHI Corp និង​ក្រុមហ៊ុន Rolls-Royce សហការអភិវឌ្ឍ​យន្តហោះចម្បាំង​ជំនាន់ក្រោយ ខណៈ​ជប៉ុន​បាន​ចុះកិច្ចព្រមព្រៀង​ជាមួយ​ក្រុមហ៊ុន Lockheed Martin រួចរាល់ហើយ។

រដ្ឋាភិបាល​ចង់​ប្រើប្រាស់​បច្ចេកវិទ្យារួមគ្នា​រវាង​ជប៉ុន អង់គ្លេស និងអាមេរិក ក្នុងការអភិវឌ្ឍ​យន្តហោះចម្បាំង ដែល​នឹង​បន្តតំណែង​យន្តហោះ F-2។

យន្តហោះចម្បាំង​ជំនាន់ក្រោយរបស់ជប៉ុន ត្រូវបាន​រំពឹងថា នឹងបញ្ចេញ​នៅពាក់កណ្តាលទសវត្សរ៍ឆ្នាំ២០៣០ ពោលគឺនៅពេល​ចាប់ផ្តើមឈប់ប្រើយន្តហោះ F-2។

ក្រុមហ៊ុន Mitsubishi ជាអ្នករចនា​គ្រោងយន្តហោះ និងអភិវឌ្ឍប្រព័ន្ធ កំពុងទទួលបាន​បច្ចេកវិទ្យាពីក្រុមហ៊ុន Lockheed Martin ហើយ។ ចំណែក​ម៉ាស៊ីនយន្តហោះ គឺ​អភិវឌ្ឍដោយ​ក្រុមហ៊ុនជប៉ុន IHI ដែល​កំពុងចរចាចុងក្រោយ​ជាមួយ​ក្រុមហ៊ុន Rolls-Royce៕