ក្រសួង​ធនធានទឹក និងឧតុនិយម បាន​ជូនដំណឹងថា ព្យុះទី៧ ឈ្មោះ សេមប៉ាកា និង​បណ្តា​ឥទ្ធិពល​នៃព្យុះផ្សេងៗទៀត និងប្រព័ន្ធនានា​ដែល​មាន​ឥទ្ធិពល​មកលើ​អាងទន្លេមេគង្គ បាន​ធ្វើឱ្យ​មានភ្លៀងធ្លាក់ក្នុងកម្រិត​ពីបង្គួរ ទៅច្រើន ក្នុងអាង​ទន្លេមេគង្គ​ភាគខាងលើមាន៖ ចិន ថៃ និងឡាវ ព្រមទាំង​តំបន់ខ្ពង់រាប ភាគឦសាន​កម្ពុជា។

ស្ថានភាព​បែបនេះ បាន​ធ្វើឱ្យ​ទឹកទន្លេមេគង្គ​ហក់ឡើង ហើយនឹង​បន្តឡើង​ក្នុងរយៈពេលពី៣ ទៅ ៤ថ្ងៃខាងមុខទៀត ដែលអាចបណ្តាលឱ្យជន់លិច​តំបន់ទំនាប​អបមាត់​ទន្លេមេគង្គលើ នៅខេត្តស្ទឹងត្រែង ក្រចេះ កំពង់ចាម និងខេត្តត្បូងឃ្មុំ។ តែការហក់ឡើងនេះ មិនទាន់​ដល់កម្រិត​កម្ពស់​ដែលត្រូវឱ្យមានការប្រុងប្រយ័ត្ន​នៅឡើយនោះទេ៕