សេតវិមានសហរដ្ឋអាមេរិច រៀបចំកិច្ចប្រជុំកំពូលមួយនៅ ថ្ងៃព្រហស្បតិ៍ ស្ដីពីអនាគតនៃរថយន្តអគ្គិសនី និងការកាត់បន្ថយប្រើប្រាស់ប្រេងសាំងក្នុងគម្រោងឆ្នាំ២០៣០ ដោយគម្រោងលក់ឡានអគ្គិសនីឱ្យបាន ៥០%។ ប៉ុន្ដែកិច្ចប្រជុំដ៏សំខាន់នេះ បែរជាអវត្តមាន Tesla ដែលជាក្រុមហ៊ុនលក់រថយន្តអគ្គិសនីធំបំផុតរបស់ប្រទេសនេះទៅវិញ។

• ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបនឹងសារព័ត៌មាន ក៏ដូចជាមហាជនជាច្រើនឆ្ងល់ពីបញ្ហានេះ Elon Musk បានបង្ហោះសារលើ Twitter ថា “វាហាក់ជាចម្លែកពិតមែន ដែលថា Tesla មិនត្រូវបានអញ្ជើញចូលរួមកិច្ចប្រជុំនេះ”។

ពិតណាស់ វាហាក់ជាចម្លែកពិតមែន ដែល Tesla មិនត្រូវបានអញ្ជើញឱ្យចូលរួម ប៉ុន្ដែបែរជាអញ្ជើញក្រុមហ៊ុនរថយន្ត Ford, General Motors និង Stellantis ដែលសុទ្ធតែជាក្រុមហ៊ុនអាមេរិច និងជាដៃគួប្រកួតប្រជែងនឹង Tesla ដោយមានគម្រោង ផលិតឡានអគ្គិសនី ៤០-៥០% សម្រាប់សហរដ្ឋអាមេរិច នាឆ្នាំ២០៣០ ខាងមុខ។

មិនតែប៉ុណ្ណោះ គេគួរដឹងថា Tesla ជាក្រុមហ៊ុនលក់ឡានអគ្គិសច្រើនបំផុតនៅទឹកដីអាមេរិច ប្រមាណ ៧៤% នៅអំឡុង៣ឆ្នាំចុងក្រោយនេះ ប៉ុន្ដែសេតវិមានបែរជាមើលរំលង Tesla ទៅវិញ។

ចំពោះបញ្ហានេះ អ្នកនាំពាក្យសេតវិមានមិនបានឆ្លើយតបទៅនឹងសំណើសុំការអត្ថាធិប្បាយពី Business Insider នោះទេ។

ប៉ុន្ដែគេមានការសង្ស័យថា ការដក Tesla ចេញពីបញ្ជីអញ្ជើញ ទំនងជាមកពីភាពល្អក់កករកាលពី ខែមីនា ត្បិត ក្រុមប្រឹក្សាទំនាក់ទំនងការងារជាតិ បានអំពាវនាវឱ្យនាយកប្រតិបត្តិ Elon Musk លុបចោលសារលើ Twitter ដែលត្រូវបានគេមើលឃើញថាជាការគំរាមកំហែងដល់សហជីពការងាររបស់ខ្លួនជាសាធារណៈ កន្លងមក៕