លិខិត​ឆ្លងដែន​របស់​ប្រជាជនអាហ្វហ្គានីស្ថាន ដែល​កំពុងព្យាយាម​រត់គេចចេញពីប្រទេស គឺស្ថិតក្នុងចំណោម​ឯកសារសំខាន់ៗ ដែលត្រូវបំផ្លាញចោលដោយ​បុគ្គលិក​ស្ថានទូតអាមេរិកប្រចាំ​ក្រុងកាប៊ុល ខណៈដែលប្រទេសនេះ ធ្លាក់ក្រោមការគ្រប់គ្រងរបស់​ក្រុមតាលីបង់។ នេះជាដំណឹង​តាមរយៈអ៊ីម៉ែល របស់​​លោក​ Andy Kimសមាជិក​សភា​​មកពីគណបក្ស​ប្រជាធិបតេយ្យ ផ្ញើទៅកាន់​ប្រជាជន​ ដែល​កំពុងស្វែងរកជំនួយ​ក្នុងការ​ចាកចេញពីអាហ្វហ្គានីស្ថាន។

លោកបាន​សរសេររៀបរាប់ថា៖ «ទិដ្ឋាការ និងលិខិតឆ្លងដែន នៅ​ស្ថានទូតអាមេរិក ត្រូវបាន​ធ្វើមោឃភាព ហើយលិខិតឆ្លងដែន​ដែល​ស្ថិតនៅក្នុងស្ថានទូត ត្រូវបានបំផ្លាញចោល។ បច្ចុប្បន្ននេះ មិនទាន់អាចផ្តល់​សេវាទិដ្ឋាការ​បន្ថែម​ក្នុងអាហ្វហ្គានីស្ថាននោះទេ»។

លោក​បន្តថា «ក្រសួងការបរទេស បាន​ក្រើនរំលឹក​ដល់​ប្រជាជន​ទាំងអស់​ដែល​កំពុងស្វែងរកការជ្រកកោន គឺត្រូវរង់ចាំការណែនាំបន្ថែម។ ពួកគ​មិនគួរទៅព្រលានយន្តហោះក្រុងកាប៊ុល រហូតដល់​មាន​ការប្រកាស​ជាថ្មី និង​ធ្វើតាមការណែនាំ​ដោយយកចិត្តទុកដាក់»៕