លោក វ៉ាង យី រដ្ឋមន្រ្តី​ការបរទេសចិន បាន​និយាយ​ថា ពិភពលោក​គួរតែ​ណែនាំ និងគាំទ្រ​ដល់​របបដឹកនាំថ្មីនៅអាហ្វហ្គានីស្ថាន របស់​ក្រុមតាលីបង់ ជាជាងការដាក់សម្ពាធ។ លោក​ថ្លែងដូច្នេះ ក្នុងជំនួប​ពិភាក្សាតាមទូរសព្ទ​ជាមួយ​រដ្ឋមន្រ្តីការបរទេសអង់គ្លេស លោក ដូមីនីក រ៉ាអាប់ នៅថ្ងៃទី១៩ សីហា ២០២១។

បើតាម​លោក វ៉ាង យី ឱ្យដឹងថា ស្ថានភាព​នៅអាហ្វហ្គានីស្ថាន នៅតែបន្តអស្ថិរភាព និង​មិនប្រាកដប្រជា។ «សហគមន៍​អន្តរជាតិ គួរតែលើកទឹកចិត្ត និងណែនាំដល់របបដឹកនាំថ្មី ក្នុងផ្លូវវិជ្ជមាន ជំនួស​ឱ្យការបន្ថែមសម្ពាធ ដែលវានឹងជួយដល់ការស្តារ​ស្ថិរភាព​ស្ថានភាព»។

លោកបន្ថែមទៀតថា សហគមន៍​អន្តរជាតិមិនគួរយកអាហ្វហ្គានីស្ថាន ធ្វើជាសមរភូមិទីលាន​នយោបាយនោះទេ ប៉ុន្តែ​គួរតែគោរព​ដល់ឯករាជ្យ​ និង​ឆន្ទៈរបស់​ប្រជាជន​អាហ្វហ្គានីស្ថាន។

គួរកត់សម្គាល់ដែរថា មុន​វាយឈ្នះ​កងទ័ពរដ្ឋាភិបាល​អាហ្វហ្គានីស្ថាន​ចូលកាន់កាប់​ក្រុងកាប៊ុល នៅថ្ងៃទី១៥សីហា ពោលគឺ​កាលពី​ថ្ងៃទី២៨ កក្កដា មេដឹកនាំ​តាលីបង់ លោក Mullah Abdul Ghani Baradar បាន​ជួបជាមួយ​លោក វ៉ាង យី រដ្ឋមន្រ្តី​ការបរទេសចិន នៅ​ក្រុងធានជីង ប្រទេសចិន ដែល​បង្ហាញពី​ទំនាក់ទំនង​ដ៏ល្អ​រវាងភាគីទាំងពីរ។

ក្នុង​ជំនួបពិភាក្សា​នោះ លោក វ៉ាង យី បានលើកឡើង​ថា ក្រុមតាលីបង់គឺ​ជាយោធា និងកម្លាំងនយោបាយ​ដ៏សំខាន់មួយ​ក្នុងប្រទេសអាហ្វហ្គានីស្ថាន ហើយ​លោករំពឹងថា ក្រុមតាលីបង់​នឹង​ដើរតួនាទី​ដ៏សំខាន់​ក្នុងដំណើរការសន្តិភាព ផ្សះផ្សារជាតិ និងការកសាងប្រទេសឡើងវិញ៕