លោក ឃួង ស្រេង អភិបាលរាជធានីភ្នំពេញបានឱ្យដឹងថា ការស្រោចវ៉ាក់សាំងជូនប្រជាពលរដ្ឋ និងការខិតខំប្រឹងប្រែង​របស់អាជ្ញាធរខណ្ឌទាំង១៤ សហការ​ជាមួយ​នឹងអនុគណៈកម្មការទាំង៣ បានធ្វើឱ្យការឆ្លងរីករាលដាលជំងឺ​កូវីដ១៩ មានការថយចុះ​យ៉ាងខ្លាំង។ ការ​ថ្លែងនេះ ក្នុងកិច្ចប្រជុំតាមរយៈការបញ្ជូនរូបភាព និងសំឡេង ( Video Conference )ជាមួយអាជ្ញាធរខណ្ឌទាំង១៤ កាលពីថ្ងៃទី១ ខែកញ្ញា ឆ្នាំ​២០២១ នៅសាលារាជធានីភ្នំពេញ ដើម្បីរិះរកគ្រប់មធ្យោបាយ​ឈានទៅរកការ​កាត់ផ្តាច់​ឱ្យបាន​នូវការរីករាលដាលនៃជំងឺកូវីដ១៩ ពិសេស មេរោគបំប្លែងខ្លួនថ្មីប្រភេទដែលតា (Delta)។

ការថយចុះនេះជាសញ្ញាដ៏ល្អមួយក្នុងការបើករាជធានីភ្នំពេញទៅជាធម្មតាឡើងវិញ ទាំងវិស័យទេសចរណ៍និងសាលារៀន ស្របទៅតាមអនុសាសន៍​របស់​សម្តេចតេជោ ហ៊ុន សែន។

បើតាមលោក ឃួង ស្រេង ពីមុនមានអ្នក​ជំងឺ​កូវីដ១៩ កើតមានច្រើន ចំណែកអ្នកស្លាប់​ដោយ​ជំងឺ​កូវីដ១៩ បានថយចុះពី ៣០នាក់ មកនៅត្រឹម ៦នាក់ឬ២នាក់​ប៉ុណ្ណោះ ក្នុង​១ថ្ងៃ។

ក្នុងឱកាសនោះដែរ លោក មាន ចាន់យ៉ាដា អភិបាលរងរាជធានីភ្នំពេញ ក៏បានមានប្រសាសន៍បញ្ជាក់ឱ្យដឹងផងដែរថា រាជធានីភ្នំពេញ បានឈានទៅរកភាពល្អប្រសើរហើយ បើមើលទៅលើលទ្ធផលនៃការឆ្លង​ជំងឺកូវីដ១៩ ក្នុងរយៈពេល២ទៅ៣សប្តាហ៍ចុងក្រោយនេះ ពោលគឺក្នុងចំនួនមនុស្ស១៨៩៨នាក់ដែលត្រូវយកសំណាក រកឃើញមានវិជ្ជមានកូវីដ១៩ ចំនួនតែ២៨នាក់ប៉ុណ្ណោះ ស្មើនឹង ៣,៥៦ ភាគរយ ក្នុងនោះមានប្រភេទ ដែលតា ចំនួន១១នាក់ស្មើនឹង១,៤៨ភាគរយ៕