ក្រសួង​សុខាភិបាល​ថៃ បាន​ប្រកាសនៅថ្ងៃទី២ សីហា ២០២១ថា ការចាក់វ៉ាក់សាំង​លាយចម្រុះគ្នារវាង sinovac និង AstraZeneca គឺ​មានសុវត្ថិភាព និង​ជោគជ័យ​ក្នុងការជំរុញ​ភាពសុំា ក្នុងចំណោម​អ្នកទទួលចាក់រួចមកហើយ​ប្រមាណ ១,៥លាននាក់។

គួរដឹងថា ថៃបានក្លាយ​ជាប្រទេស​ដំបូងគេ​ ដោយបាន​ចាក់​វ៉ាក់សាំង​លាយចម្រុះគ្នានេះ កាលពីខែកក្កដា ខណៈដែល​ថៃ កំពុង​ញាំញី​ករណីឆ្លងកូវីដ១៩ កើនឡើងខ្ពស់។

មន្រ្តីជាន់ខ្ពស់​ក្រសួងសុខាភិបាលថៃ លោក Supakit Sirilak បាន​ថ្លែងថា «រូបមន្ត​នៃការ​ចាក់លាយវ៉ាក់សាំង​ ទៅលើ​មនុស្សជាង ១,៥លាននាក់ គឺមានសុវត្ថិភាព។ សូមកុំនិយាយថា វានឹង​បង្កើនការព្រួយបារម្ភ»។

លោក​បន្ថែមថា ក្រោយ​ពិនិត្យឃើញ​លទ្ធផលដ៏ល្អនេះ ថៃ​នឹង​មិន​ផ្តល់​ការចាក់ Sinovac ២ដូសនោះទេ មានន័យថា ចាក់ Sinovac ១ដូស លាយជាមួយ AstraZeneca ១ដូស៕