លោក Li Tie គ្រូជម្រើសជាតិចិន បាន​ជំរុញ​ឱ្យកូនក្រុម​របស់លោក ធ្វើយ៉ាង​ណាឱ្យខិតខំលេង​ដូចក្នុងវគ្គផ្តាច់ព្រ័ត្រ ពេល​ប៉ះជប៉ុន នៅវគ្គជម្រុះ World Cup 2022 យប់នេះ ដែល​ធ្វើឡើង​នៅទឹកដីកណ្តាល ក្រុងដូហា។

លោក​ថ្លែងក្នុងសន្និសីទកាសែត​ម្សិលមិញ​យ៉ាងដូច្នេះថា៖ «យើង​បាន​រៀបចំ​យ៉ាងល្អ​ត្រៀម​ប្រកួត​ជាមួយ​ជប៉ុន។ ខ្ញុំសង្ឃឹម​ថា កីឡាករ​អាចលេង​ក្នុងការប្រកួតនេះ ដូច​ក្នុងវគ្គផ្តាច់ព្រ័ត្រ ហើយ​បញ្ចេញឱ្យអស់ពី​សមត្ថភាព។ គ្មាន​អ្វីដែល​ឆ្ងល់ទេ ព្រោះជប៉ុន​ជាក្រុម​ដ៏ខ្លាំង​បំផុត​នៅអាស៊ី ខ្ញុំសង្ឃឹម​ថា ក្រុមទាំងមូល នឹង​មានទឹកចិត្តក្លាហាន​ហ៊ានលេង​នឹង​គូប្រកួតដ៏ខ្លាំងបែបនេះ»។

លោក Li បាន​អះអាងថា កីឡាករ​៣រូប​សំខាន់ៗ​ដែលរបួសនោះ គឺ​មានសុខភាព​ប្រសើរឡើងវិញជិត ១០០% ហើយ ដែលអាច​ចូលរប្រកួត​យប់នេះបាន។ លោកក៏រំពឹងដែរថា អ្នកគាំទ្រ​ចិន នឹង​ចូលរួមទស្សនា​ដែល​ជាឱកាស​សម្រាប់​ក្រុមលោក​ បង្កើនស្មារតីប្រកួតជាមួយជប៉ុន៕