ទីតាំងផ្សារទំនើប ៨ ទៀត ត្រូវបានដាក់ធុងប្រមូលសំណល់ថ្មពិលបន្ថែម

  • 2021-09-09 06:43:32
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ក្រសួងបរិស្ថាន នៅថ្ងៃទី ០៨ ខែកញ្ញា ឆ្នាំ ២០២១ បានដាក់ធុងប្រមូលថ្មពិលបន្ថែមនៅតាមទីតាំងផ្សារទំនើប ចំនួន​ ៨​ ទៀត រួមមាន​ ផ្សារទំនើប​ សូរិយា​ ផ្លាហ្សា​ ឡាក់គី​ Exchange Square Eden Garden អូឡាំព្យា​ ស្ទឹងមានជ័យ​ថ្មី​ និងធីខេ ហើយនឹងនៅស្ថានីយប្រេងឥន្ធនៈតូតាល់​ និងតេលា​ ដើម្បីបង្កភាពងាយស្រួលដល់ប្រជាពលរដ្ឋរស់នៅក្នុងរាជធានីភ្នំពេញ យកសំណល់ថ្មពិលមកទុកក្នុងធុងប្រមូលថ្មពិល។ នៅពេលខាងមុខ ក្រសួងបរិស្ថាននឹងបន្តពង្រីកវិសាលភាពនៃការដាក់ធុងថ្មពិលនេះតាមទីតាំងសំខាន់ៗបន្ថែមទៀតនៅតាមបណ្តារខេត្តទូទាំងប្រទេស។

សំណល់ថ្មពិលត្រូវបានចាត់ទុកជាសំណល់គ្រោះថ្នាក់ដោយសារសំណល់នេះមានផ្ទុកសារធាតុគ្រោះថ្នាក់ពពួកលោហះធ្ងន់ មានជាអាទិ បារត សំណ កាត់ម៉្ញូម សង្ក័សី និង នីកែល ។ សារធាតុគ្រោះថ្នាក់ដែលមានផ្ទុកនៅក្នុងសំណល់អាចបង្កផលប៉ះពាល់ធ្ងន់ធ្ងរដល់សុខភាពមនុស្ស សត្វ និងបរិស្ថាន នៅពេលសាយភាយចូលទៅក្នុងបរិស្ថានតាមរយះការទុកដាក់សំណល់នេះមិនបានត្រឹមត្រូវ ។

ដើម្បីទប់ស្កាត់ការសាយភាយសារធាតុគ្រោះថ្នាក់ពីសំណល់ថ្មពិលចូលទៅក្នុងបរិស្ថាន និង ដើម្បីការពារសុខភាពមនុស្ស សូមវេចខ្ចប់ និងយកសំណល់ថ្មពិលមកទុកក្នុងធុងដែលកន្លងមកក្រសួង​បរិស្ថាន បានដាក់ នៅតាមបុរី ស្ថានីយប្រេងឥន្ធះ ផ្សារទំនើប។ កន្លងមកក្រសួងបរិស្ថានបានដាក់ធុងប្រមូលថ្មពិលនៅបុរីប៉េងហួតបឹងស្នោ ស្ថានីយ៍ប្រេងឥន្ធះភីធីធី (និរោធ បូកគោ វត្តនាគវន្ត័ និង ផ្សារតូច ) ផ្សារទំនើបអេអន១ នរត្តមជីមម៉ុងម៉ល់ និងផ្សារទំនើបជីមម៉ុងបាក់ទូក៕

អត្ថបទ៖ ម៉េងងី

;