លោក ឃួង ស្រេង អភិបាល​រាជធានីភ្នំពេញ បាន​ថ្លែងព្រឹកនេះ​ថា វ៉ាក់សាំង​ពេលនេះពុំទាន់ក្លាយជាកាតព្វកិច្ចសម្រាប់​សិស្សនៅឡើយទេ ពោលគឺ​សិស្សដែលមិនទាន់បានចាក់វ៉ាក់សាំង គឺអាចចូលរៀននៅសាលាវិញបាន ប៉ុន្តែត្រូវដាក់ឱ្យនៅឆ្ងាយពីគេ ដើម្បីការពារពីការឆ្លងកូវីដ១៩។

លោកបញ្ជាក់​ទៅកាន់អ្នកកាសែត​ក្នុងពេលចុះអញ្ជើញចុះពិនិត្យការបាញ់ថ្នាំសំលាប់មេរោគក្នុងបរិវេណវិទ្យាល័យ ជា សុីមសន្ធរម៉ុក ដើម្បីត្រៀមបើកគ្រឹះស្ថានអប់រំចំណេះដឹងទូទៅជំហានដំបូងចាប់ពីថ្នាក់អនុវិទ្យាល័យ និងវិទ្យាល័យ ដោយបើកចាប់ពីថ្ងៃទី១៥ ខែកញ្ញា ឆ្នាំ២០២១ យ៉ាងដូច្នេះថា៖

«វ៉ាក់សាំង​មិនទាន់ទៅជាវ៉ាក់សាំងកាតព្វកិច្ចទេ ប៉ុន្តែវ៉ាក់សាំង​ត្រូវតែ​ជារបស់​សំខាន់សម្រាប់​ជួយ​ឈានមុខ​ក្នុងការទប់ស្កាត់​កូវីដ១៩។ កូនសិស្ស​ដែល​អត់ទាន់បានចាក់​ ក៏ឱ្យគាត់មករៀន​ ប៉ុន្តែ​ឱ្យគាត់​នៅឆ្ងាយពីគេ។ មិនប្រាកដថាគាត់​ឆ្លងទៅគេទេ តែគេអាចឆ្លងទៅគាត់ ព្រោះគាត់អត់មានប្រព័ន្ធការពារ អ៊ីចឹង​ត្រូវការពារគាត់​ មិនមែនរើសអើងទេ»។

បើលោក​អភិបាលរាជធានីភ្នំពេញ ចំពោះ​គ្រូបង្រៀន​ដែលមិនបានចាក់វ៉ាក់សាំង ដោយសារបញ្ហាសុខភាព គឺ​ឱ្យនៅបង្រៀនតាមអនឡាញសិន ហើយចំពោះ​គ្រូ​ដែលបានចាក់វ៉ាក់សាំងគ្រប់ដូស ឬបានដូសទី៣ គឺត្រូវបានលើកទឹកចិត្ត​ឱ្យបង្រៀន​ផ្ទាល់ក្នុងថ្នាក់៕