រោងចក្រដំឡើងរថយន្តនៅ កម្ពុជា មាន ៤ ក្រុមហ៊ុនហើយគិតត្រឹមឆ្នាំ ២០២១ នេះ

2021-09-14 11:02:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ពីមួយឆ្នាំទៅមួយឆ្នាំ គេមើលឃើញថា វិស័យឧស្សាហកម្មយានយន្ត ប្រទេសកម្ពុជា ទាក់ទាញក្រុមហ៊ុនធំៗជាបន្តបន្ទាប់មកបោះទុនវិនិយោគទឹកប្រាក់ជាច្រើនពាន់ដុល្លារ សង់រោងចក្រដំឡើងរថយន្ត។

មកដល់ឆ្នាំ ២០២១ ក្រុមហ៊ុនសរុបទាំងអស់ចំនួន ៤ ក្នុងនោះមានក្រុមហ៊ុនចំនួន ៣ កំពុងបើកដំណើរការរោងចក្រដំឡើងរថយន្ត រួចមកហើយ។ ជាពិសេសថ្មីៗនេះមានក្រុមហ៊ុន RMA មួយទៀតទើបនឹងបង្ហាញពីគម្រោងច្បាស់លាស់ថា មកបោះទីតាំងបង្កើតរោងចក្រដំឡើងរថយន្តដ៏ធំមួយ នៅខេត្តពោធិ៍សាត់ សម្រាប់ផ្គត់ផ្គង់ទីផ្សារក្នុងស្រុក។

១) ក្រុមហ៊ុន Hyundai ៖ កាលពីឆ្នាំ ២០១១ រោងចក្រដំឡើងរថយន្តដំបូងរបស់ក្រុមហ៊ុន Hyundai បានជ្រើសយកតំបន់សេដ្ឋកិច្ចពិសេសក្នុងទឹកដីខេត្តកោះកុង ធ្វើជាទីតាំង និងជាការវិនិយោគរួមគ្នារវាងក្រុមហ៊ុន KH Motors និងក្រុមហ៊ុនលីយ៉ុងផាត់ (ខេមបូឌា)។

រូបថតដោយ Sabay/PUSAM

រោងចក្រនេះអាចផ្គុំដំឡើងរថយន្តបានចំនួន ៣ ០០០គ្រឿងក្នុងមួយឆ្នាំ ជាប្រភេទ SUV ជារថយន្តតួខ្ពស់ៗ, រថយន្តច្រើនបាំង (ឡានទួរីស៍) និងប្រភេទកូនឡានតូចៗនៅឆ្នាំ ២០១៧ ។

២) ក្រុមហ៊ុន Daehan ៖ កាលពីថ្ងៃទី ៩ ឧសភា ២០១៨ ក្រុមហ៊ុន Daehan Auto មានមូលដ្ឋាននៅប្រទេសកូរ៉េ បានចាប់ផ្ដើមបើករោងចក្រដំឡើងរថយន្ត នៅក្រុងបាវិត ខេត្តស្វាយរៀង។

រថយន្តដំឡើងនៅក្នុងរោងចក្ររបស់ក្រុមហ៊ុន DAEHAN AUTO នៅខេត្តស្វាយរៀង | រូបថត៖ FB សម្តេច ហ៊ុន សែន

ក្រុមហ៊ុនដំឡើងរថយន្តទីពីរបន្ទាប់ពី Hyundai ។ ក្នុងមួយឆ្នាំរោងចក្រអាចដំឡើងរថយន្តខ្ទង់ ២០០០០ គ្រឿង។ រោងចក្រខាងលើតំឡើងបាន រថយន្តជាច្រើនប្រភេទ ដែលមាន រថយន្តតូចសំរាប់គ្រួសា រថយន្តសំរាប់ដឹកភ្ញៀវ រថយន្តសំរាប់ដឹកឥវ៉ាន់ និងរថយន្តសំរាប់ដឹកកម្មករ ជាដើម សម្រាប់ផ្គត់ផ្គង់ទីផ្សារក្នុងស្រុក និងនាំចេញទៅក្រៅប្រទេស។

៣) ក្រុមហ៊ុន International VCV Industry CO,.ltd កាលពីថ្ងៃទី ២៨ មិនាឆ្នាំ ២០១៨ ក្រុមហ៊ុនទទួលវិញ្ញាបនបត្រ័ចុះបញ្ជីជាស្ថាពរ លើគម្រោងបង្កើតរោងចក្រផ្គុំ និងដំឡើងរថយន្ត។

រូបតំណាង

គម្រោងបង្កើតរោងចក្រផ្គុំ និងដំឡើងរថយន្ត បោះទុនក្នុងទំហំទឹកប្រាក់ប្រមាណ ៤. ០៧លានដុល្លារអាមេរិក អាចបង្កើតការងារបានចំនួន ៨២០ កន្លែង។ រោងចក្រនេះស្ថិតនៅភូមិទ្រុងមាន់ សង្កាត់អូរបែកក្អម (អតីតភូមទឹកថ្លា សង្កាត់ទឹកថ្លា) ខណ្ឌសែនសុខ ភ្នំពេញ។

៤) ក្រុមហ៊ុន RMA Cambodia នៅថ្ងៃទី ១៤ ខែកញ្ញាឆ្នាំ ២០២១ រោងចក្រដំឡើងរថយន្ត Ford ដោយបោះទុនវិនិយោគប្រមាណ ២១លានដុល្លារអាមេរិក។ រោងចក្រនោះមានទីតាំងឃុំស្នាអន្សា ស្រុកក្រគរ ខេត្តពោធិ៍សាត់ គ្រោងនឹងបញ្ចប់ការសាងសង់នៅឆ្នាំ ២០២២ ខាងមុខនេះ។

រូបគម្រោង រោងចក្រតំឡើងរថយន្ត Ford នឹងត្រូវបង្កើតឡើងនៅស្រុកក្រគរ ខេត្តពោធិ៍សាត់

ក្រោយបញ្ចប់ការសាងសង់ រោងចក្រនឹងតំឡើងរថយន្តពីរម៉ូឌែលមុនគេដូចជា៖ រថយន្ត Ford Ranger និងរថយន្ត Ford Everest ។ ចំពោះគម្រោងក្នុងឆ្នាំដំបូងនឹងតំឡើងឲ្យបាន ៤៥០០ គ្រឿងនិងកើននៅឆ្នាំបន្តបន្ទាប់ ១០ ឆ្នាំក្រោយក្រុមហ៊ុន Ford គ្រោងនឹងបង្កើនដល់ ២ ម៉ឺនគ្រឿង ព្រមទាំងបន្ថែមម៉ូឌែលល្បីៗជាច្រើនទៀត៕

អត្ថបទ៖ រក្សា