អាមេរិក នឹង​ជួយ​អូស្ត្រាលី​ឱ្យទទួលបាន​នាវាមុជទឹក​ដើរដោយថាមពលនុយក្លេអែ៊រមួយ ដែល​ជាផ្នែកមួយ​ក្នុងការជួយដល់សម្ព័ន្ធមិត្ត​​យុទ្ធសាស្រ្តឥណ្ឌូ-ប៉ាស៊ីហ្វិក។ នាវាមុជទឹកនេះ នឹងប្រើប្រាស់​បច្ចេកវិទ្យា​របស់​អាមេរិក និងអង់គ្លេស។

ការប្រកាស​ខាងលើនេះ ធ្វើឡើង​ក្នុងកិច្ចប្រជុំ​តាមអនឡាញរវាង​ប្រធានាធិបតីអាមេរិក លោក ចូ បៃឌិន នាយករដ្ឋមន្រ្តីអូស្ត្រាលី លោក ស្កុត ម៉ូរីសុន និងនាយករដ្ឋមន្រ្តីអង់គ្លេស លោក បូរីស ចនសុន។ ប៉ុន្តែវាអាចនឹង​ធ្វើឱ្យប៉ះពាល់ដល់​បារាំង ដែល​កំពុង​ព្យាយាម​ចរចា​ក្នុងការលក់នាវាមុជទឹក​ឱ្យអូស្ត្រាលី តម្លៃរាប់ពាន់លានដុល្លារ។

ដៃគូ ៣ប្រទេសនេះ (អាមេរិក អង់គ្លេស អូស្ត្រាលី) ដែល​ហៅកាត់ថា AUKUS គឺ​ជា​ជំហាន​ថ្មី​មួយទៀត​ក្នុងប្រវត្តិសាស្រ្ត​របស់​ក្រុងវ៉ាស៊ីងតោន ដែល​ផ្តោតលើ​បញ្ហាតំបន់ ដែល​ជាកន្លែងប្រឈម​នឹង​ឥទ្ធិពលរបស់ចិន។ នេះបើតាម​ការបញ្ជាក់​របស់​មន្រ្តី​អាមេរិក​មួយរូប ដែលមិនបញ្ចេញឈ្មោះ។

មន្រ្តីរូបនោះ លើកឡើងថា ប្រទេសប្រជាធិបតេយ្យ​ទាំង៣ នឹង​រួមគ្នា​ផ្តោតលើ​ cyber, AI, បច្ចេកវិទ្យា quantum និង​សមត្ថភាព​ក្រោមសមុទ្រ។ ក្នុងនោះ​គំនិត​ផ្តួចផ្តើមដំបូងរបស់ AUKUS នឹង​គាំទ្រ​អូស្ត្រាលីឱ្យទទួលបាន​នាវាមុជទឹក​ដើរដោយនុយក្លេអ៊ែរ ប៉ុន្តែមិនមែន​ជាអាវុធនុយក្លេអ៊ែរនោះទេ៕