Angelina Jolie និងអតីតស្វាមីមានទំនាស់ពាក់ព័ន្ធនឹងទ្រព្យសម្បត្តិ ១៦៤លានដុល្លារ

2021-09-23 02:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កំពូលតារាសម្ដែងប្រុសអាមេរិក Brad Pitt ចោទអតីតភរិយាថា ប្រើល្បិចដើម្បីយកចំណេញពីអចលនទ្រព្យតម្លៃ ១៦៤លានដុល្លាររបស់អ្នកទាំង២។

កាលពីថ្ងៃទី ២២ ខែកញ្ញាមុននេះ បណ្ដាញព័ត៌មាន Page Six បានរាយការណ៍ថា តារាសម្ដែងលំដាប់ A អាមេរិក Brad Pitt បានប្រតិកម្មជាខ្លាំង នៅពេលអតីតភរិយារបស់ខ្លួន តារាសម្ដែងស្រី Angelina Jolie ស្ងាត់ៗលក់ភាគហ៊ុនចំនួន ៥០%នៃអចលនទ្រព្យនៅ Chateau Miraval ប្រទេសបារាំង ដោយមិនឲ្យលោកជាអ្នកទិញទី១។

នៅក្នុងបណ្ដឹងនៅក្រុង Luxembourg តារាសម្ដែងប្រុសរូបនេះបានឲ្យដឹងថា អ្នកទាំង២សុទ្ធតែមានភាគហ៊ុនស្មើគ្នានៅលើដីដែលមានតម្លៃ ១៦៤លានដុល្លារខាងលើ។ នៅពេលពួកគេលែងលះ អចលនទ្រព្យមួយនេះត្រូវបានក្រុមហ៊ុនរបស់ Jolie ជាអ្នកដំណើរការតែពួកគេនៅចេញលុយដំណើរការស្មើគ្នា។

នៅក្នុងបណ្ដឹងដដែរ ប្រុសស្អាតរូបនេះបានបន្ថែមថា ប្រសិនបើលក់ចំណែករបស់ខ្លួន អតីតភរិយាត្រូវតែប្រាប់លោកជាមុន ឬសុំការអនុញ្ញាតសិន តែនៅពេលលក់ភាគហ៊ុន៥០%នេះចេញ ស្រីស្អាតខាងលើមិនបានឲ្យសិទ្ធិ អតីតស្វាមីជាអ្នកបានទិញមុនឡើយ។

មុននោះដែរ កាលពីខែកក្កដា ភាគីខាង Agelina Jolie បានចោទអតីតស្វាមីថា បានរារាំងនាងមិនឲ្យលក់ភាគហ៊ុនឲ្យភាគីទី៣ ដែលអាចធ្វើឲ្យនាងបាត់បង់អតិថិជន ត្បិតភាគីទី៣មិនអាចចាំបានយូរ។ គួរបញ្ជាក់ផងដែរ អចលនទ្រព្យដែលមានទំហំ១០០០ហិកតានេះមានអត្ថន័យពិសេសសម្រាប់អ្នកទាំង២ត្បិតពួកគេធ្លាប់រៀបការនៅទីនេះដោយមានការចូលរួមតែពីសំណាក់កូន ៦នាក់៕