ការ​សាងសង់​ផ្លូវជាតិលេខ១០ ភ្ជាប់ពីបាត់ដំបង-ពោធិ៍សាត់-កោះកុង នឹងត្រូវប្តូរទិសផ្លូវ ព្រោះវាត្រូវកាត់​លើភ្នំក្រវាញ បើមិនប្តូរទិសទេ គឺនឹង​ត្រូវវះភ្នំនេះ​ជាពីរតែម្តង ដែល​នាំដល់ការខូចខាត​បរិស្ថាន​យ៉ាងធ្ងន់ធ្ងរ។ នេះបើតាម​ការបញ្ជាក់របស់​លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី​ក្រសួងសាធារណការ និងដឹកជញ្ជូន ក្នុងសន្និសីទកាសែត​មួយកាលពីថ្ងៃទី១ ខែតុលា ឆ្នាំ​២០២១។

លោក​បានថ្លែងដូច្នេះថា៖ «**មានមួយផ្នែក យើងទើបតែប្តូរទិស​របស់​ផ្លូវនោះ បើយើងមិនប្តូរនោះទេ គឺផ្លូវហ្នឹងកាត់វះ​ភ្នំក្រវាញជាពីរ ដែល​ធ្វើឱ្យខូចខាតបរិស្ថាន។ ដូច្នេះ​សម្តេចអគ្គមហាសេនាបតីតេជោ ហ៊ុន សែន បានឯកភាព​ឱ្យយើងប្តូរទិសមួយចំនួន ឱ្យឃ្លាតឆ្ងាយពីតំបន់នោះ កុំឱ្យខូចខាត​បរិស្ថាន​របស់យើង**»។

លោកទេសរដ្ឋមន្រ្តី​ឱ្យដឹងថា លោក​បានជិះឧទ្ធម្ភាគចក្រ​ជាមួយ​រដ្ឋមន្រ្តីបរិស្ថាន លោក សាយ សំអាល់ ដោយពិនិត្យឃើញថាមិនគួរ​ធ្វើត្រង់មក​កាត់​លើភ្នំក្រវាញទេ។ ចំពោះការ​ប្តូរទិសផ្លូវនេះ គឺត្រូវថែមថវិកាជិត ៦០លានដុល្លារឯណោះ។

គម្រោងសាងសង់​ផ្លូវជាតិលេខ១០ មាន​ប្រវែងសរុប ១៩៧,៣៦គីឡូម៉ែត្រ និងទទឹងតួផ្លូវ ៩ម៉ែត្រ តភ្ជាប់ពីសំឡូត ខេត្តបាត់ដំបង ឆ្លងកាត់វាលវែង អូរសោម ខេត្តពោធិ៍សាត់ ភ្ជាប់ទៅខេត្ត​កោះកុង។ ក្នុងនោះមាន​ការសាងសង់ស្ពានចំនួន ៣៣កន្លែងប្រវែងសរុប ២៣៦១ម៉ែត្រ។ ផ្លូវនេះគ្រោងចំណាយប្រមាណ​ជាង ១៨៨លានដុល្លារ ជាហិរញ្ញប្បទានរបស់ប្រទេសចិន និងថវិកាបដិភាគរបស់​រាជរដ្ឋាភិបាលកម្ពុជា៕