លោក ហាវ គង់ងី បើកអាជីវកម្មផលិតឥដ្ឋបរិស្ថានដំបូង ព្រោះចង់ជួយអ្នកមានជីវភាពមធ្យមមានលទ្ធភាពធ្វើផ្ទះបានល្អរស់នៅ

2021-12-17 04:44:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ហាវ គង់ងី ដែលកំពុងជោគជ័យក្នុងអាជីវកម្មផលិតឥដ្ឋបរិស្ថាន បានបង្ហាញពីគោលបំណង់នៃការចាប់ផ្ដើមបើកអាជីវកម្មរកសុីរបស់ខ្លួន មិនត្រឹមតែយកលុយបង្កើតលុយទេ តែចង់ជួយអ្នកមានជីវភាពមធ្យមមានលទ្ធភាពធ្វើផ្ទះល្អបានរស់នៅ។ លោកក៏បានបង្ហាញបទពិសោធន៍ពីការបើកអាជីវកម្មរកសុី គន្លឹះថ្មីពីដំណើរការបើករកសុីដំបូង ដល់ប្រិយមិត្តិក្នុងកម្មវិធី Starting Up សម្រាប់សប្ដាហ៍ទី២០។

លោក ហាវ គង់ងី មានដើមកំណើតមកពីខេត្តកំពង់ធំ បានបន្តរៀនថ្នាក់បហាវិទ្យាល័យនៅឆ្នាំ២០០២ និងបានបញ្ចប់បរិញ្ញាប័ត្រសង្គមវិជ្ជាឆ្នាំ ២០០៦ និងបញ្ចប់ថ្នាក់អនុបណ្ឌិត ផ្នែកសិក្សាអភិវឌ្ឍន៍ឆ្នាំ ២០១០ ពីសាកលវិទ្យាល័យភូមិន្ទភ្នំពេញ។ ក្នុងអំឡុងពេលសិក្សាថ្នាក់មហាវិទ្យាល័យលោក ហាវ គង់ងី បានចាប់ផ្ដើមធ្វើការតាំងពីឆ្នាំទី២ ជាមួយអង្គការជាតិ និងអន្តរជាតិលើផ្នែកស្រាវជ្រាវសង្គមនាពេលកន្លងមក ដោយទទួលបានបទពិសោធន៍ការងារជាង ៧ឆ្នាំ។

លោក ហាវ គង់ងី ក៏បានធ្លាប់បញ្ចប់សញ្ញាប័ត្រជំនាញបច្ចេកទេសអាជីវកម្មបៃតងពីប្រទេសអាល្លឺម៉ង់។ ក្រៅពីពីចំណេះដឹងខ្ពស់បញ្ចប់ការសិក្សាពីក្រៅប្រទេស លោកក៏ធ្លាប់ជួបផ្ទាល់និងរៀនតាមអនឡាញពីអ្នកជំនាញ អូស្ត្រាលី អាល្លឺម៉ង់ ថៃ ឥណ្ឌា ហូឡង់និងអាមេរិច ជាដើម។ មុនពេលចាប់ផ្ដើមបង្កើតសហគ្រាសសង្គម ម៉ាយឌ្រីមហូម ផលិតឥដ្ឋបរិស្ថាន លោក ហាវ គង់ងី បានចាប់ផ្ដើមមានគំនិតរកសុីនៅចុងឆ្នាំ២០១៣ បន្ទាប់ពីត្រឡប់មកពីប្រទេសអូស្ត្រាលីវិញ នៅឆ្នាំ២០១៥ អាជីវកម្មផលិតឥដ្ឋបរិស្ថាន បានដំណើរការដោយរលួននិងមានអ្នកគាំទ្រជាច្រើន ដែលលោកបានផលិតឥដ្ឋប្រភេទឡេហ្គូ (ជាប្រព័ន្ធឥដ្ឋលកញឺឈ្មោល)។

លោក ហាវ គង់ងី ក៏ធ្លាប់យកស្នាដៃទៅពិសោធន៍នៅសាលាតិចណូ បានស្តង់ដារកម្រិតខ្ពស់ជាងឥដ្ឋធម្មតា។ «ឥដ្ឋប្រភេទឡេហ្គូ» នរណាក៏ស្គាល់ព្រោះធ្លាប់ជាល្បែងលេងរបស់ក្មេងៗយកទៅសាងសង់អគារ សំណង់នានានិងបង្កើនប្រាជ្ញាកុមារ។ កម្ពុជា ក៏មានប្រព័ន្ធឥដ្ឋនេះរាប់ពាន់ឆ្នាំបង្កប់ក្នុងតួប្រាសាទ អង្គរវត្ត ភ្ជាប់ថ្មមួយដុំភ្ជាប់ទៅថ្មមួយដុំទៀត មានគន្លាក់លកញឺឈ្មោលនៅខាងក្រោម។ បច្ចេកទេស ប្រើប្រាស់ឥដ្ឋនេះធ្វើឡើង សិក្សាតាមលំនាំប្រព័ន្ធឥដ្ឋឡេហ្គូ និងប្រព័ន្ធលកញឺឈ្មោល។

ចំពោះផលវិបាកវិញលោក ហាវ គង់ងី ធ្លាប់ជួបប្រទះដូចជាផលិតឥដ្ឋបែបនេះពិបាកបំផុតគឺ ដី។ ជួនដីយើងចង់បាន ជួនខ្លះដីយើងចង់បាន។ ពេលភ្លៀងក្លាយជាកង្វល់ធំជាងគេព្រោះពិបាករែងដីឲ្យម៉ត់។ «សម្ភារៈផលិតគឺ ដីម៉ត់ រែងលាយ ជាមួយស៊ីម៉ង់ បញ្ចូលទៅក្នុងម៉ាស៊ីនលាយ រួមផ្សំ ទឹកនិងសារធាតុមួយចំនួនឲ្យដីឆាប់រឹង។ រួចបញ្ចូលទៅម៉ាស៊ីនពុម្ភសង្កត់វាក្លាយទៅជាឥដ្ឋ។ កម្លាំងសង្កត់ត្រូវប្រើសម្ពាធ១តោនជាង»។

ឥដ្ឋបរិស្ថាននេះមានអត្ថប្រយោជន៍ច្រើនយ៉ាង បើធៀបនឹងឥដ្ឋក្រហមធម្មតាសព្វថ្ងៃ ដូចជាការរៀបតាមឥដ្ឋ នេះលឿន រហ័ស និងចំណាយទាបជាងមុនសន្សំបានពី ២០-៤០% មិនចាំបាច់ជាងមានជំនាញក៏អាច រៀបខ្លួនឯងល្អប្រណិតដែរ។ បច្ចុប្បន្ន សហគ្រាសសង្គម ម៉ាយឌ្រីមហូម ផលិតឥដ្ឋបរិស្ថាននេះ មានសាខា២គឺ ភ្នំពេញនិងសៀមរាប។ ថ្ងៃអនាគតគ្រោងពង្រីកផលិតផលក្នុងស្រុកដទៃបន្ថែមទៀត ក្នុងវិស័យសំណង់ ដើម្បីឲ្យងាយស្រួលបំពេញសេចក្ដីត្រូវការរបស់ពលរដ្ឋខ្មែរ៕

ចង់ជ្រាប់កាន់តែច្បាស់ពីបទពិសោធន៍ការងារ និងគោលបំណងចម្បងក្នុងការបង្កើតអាជីវកម្មនេះឡើង សូមទស្សនាវិដេអូខាងក្រោម៖