អ្នកស្រី ឃី មុនី ប្រាប់គន្លឹះភាពជោគជ័យបង្កើតក្រុមហ៊ុន Amru Rice នាំចេញអង្ករខ្មែរ ទៅកាន់ជាង ៤០ប្រទេស

2021-12-30 03:38:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកស្រី ឃី មុនី គឺជាស្ថាបនិកក្រុមហ៊ុននាំចេញអង្ករសរីរាង្គ Amru Rice ដែលបានចូលខ្លួនមកបើកកកាយជីវប្រវត្តិ ការសិក្សា បទពិសោធន៍ការងារ ដំណើរជីវិត មុនឈានជើងមកដល់ភាពជោគជ័យបង្កើតក្រុមហ៊ុននេះឡើង និងមានការទទួលស្គាល់ពីបណ្ដាញសហគមន៍អឺរ៉ុបលើគុណភាពរបស់អង្ករនាំចេញ ហើយបានឈរជើងនៅលើទីផ្សារអស់រយ:ពេលជាង ១០ឆ្នាំរហូតមកដល់ពេលបច្ចុប្បន្ន នៅក្នុងកម្មវិធី Starting Up ក្នុងសប្ដាហ៍នេះ។

មុនឈានដល់ការបង្កើតក្រុមហ៊ុននេះឡើងអ្នកស្រី ឃី មុនី ជានិស្សិតដែលបានបញ្ចប់ថ្នាក់បរិញ្ញាប័ត្រផ្នែកគណនេយ្យ នៅសាកលវិទ្យាល័យភូមិន្ទនិតិសាស្រ្តនិងវិទ្យាសាស្រ្តសេដ្ឋកិច្ច។ លោកស្រីបានចាប់ផ្ដើមមានគំនិតរកសុីនេះតាំងពីកំពុងសិក្សាថ្នាក់បរិញ្ញាប័ត្រមក បើនិយាយទៅដល់ជីវិតការងារ អ្នកស្រី ធ្លាប់ធ្វើជាអ្នកហាត់ការ ផ្នែកគណនេយ្យនៅក្រុមហ៊ុនមួយនៅ ទីក្រុងភ្នំពេញ។

ងាកមកក្រុមហ៊ុន Amru Rice ទើបបានចាប់ផ្តើមនៅឆ្នាំ ២០១៣ ដោយទទួលបានការគាំទ្រយ៉ាងខ្លាំងក្នុងស្រុក រហូតទទួលបានចំណាត់ថ្នាក់លេខ ១ទូទាំងប្រទេសកម្ពុជាពីគុណភាព និងភាពច្នៃប្រឌិតទាំងការវិចខ្ចប់។ រហូតដល់ឆ្នាំ ២០១៧ អ្នកស្រី ឃី មុនី ដែលជានាយិកាក្រុមហ៊ុននាំចេញអង្ករសរីរាង្គទៅកាន់ក្រៅប្រទេសនេះ ទទួលពានរង្វាន់សហគ្រិនស្ត្រីវ័យក្មេងដ៏ឆ្នើមបំផុត។

ចំពោះផលវិបាកវិញ អ្នកស្រី ឃី មុនី ប្រាប់ថាពេលបង្កើតក្រុមហ៊ុននេះឡើងនៅឆ្នាំ២០១៣ គឺត្រូវចាប់ដៃគូរជាមួយបងប្អូនកសិករ និងត្រូវធ្វើយ៉ាងណាដើម្បីឲ្យប្រជាកសិករដាំដុះស្រូវដែលមានគុណភាពដើម្បីត្រូវជាមួយទីផ្សារ។ លើសពីនេះខាងក្រុមហ៊ុនត្រូវធ្វើយ៉ាងណាឲ្យបងប្អូនកសិករស្គាល់ពីអ្វីដែលហៅថាស្តង់ដារ ត្រូវមានរបាយការណ៍ច្បាស់លាស់ពីការដាំដុះ។ អ្នកស្រី ឃី មុនី បន្ថែមថាឧបសគ្គធំបំផុតមួយទៀតគឺក្រុមហ៊ុនត្រូវចំណាយដើមទុនច្រើន និងពេលវេលាក្នុងបង្រៀនកសិករឲ្យចេះពីរបៀបដាំដុះ និងការគ្រប់គ្រង់ចំណូលចំណាយរបស់ពួកគាត់។

អ្នកស្រី មុនី បង្កើតក្រុមហ៊ុន Amru Rice ដោយបានផ្តល់ឱ្យក្រុមគ្រួសារកសិករ អាចផលិតអង្ករសរីរាង្គរបស់ខ្មែរនាំចេញទៅបរទេស ជាង ៤០ ប្រទេស ជួយដល់កសិករខ្មែរច្រើនជាង ៥ ពាន់គ្រួសារ។ ចំពោះមហិច្ឆតា ចង់ក្លាយជាក្រុមហ៊ុនស្ដង់ដារអន្តរជាតិឈានមុខគេនាំចេញអង្ករសរីរាង្គ ស្នាដៃកសិករខ្មែរ ទៅកាន់ទីផ្សារអឺរ៉ុប និងផ្ដល់ការងារជូនយុវជន-យុវតីជាច្រើនពាន់នាក់។

ដើម្បីជ្រាប់កាន់តែច្បាស់ប្រិយមិត្តរបស់កម្មវិធី Starting Up សូមទស្សនាកិច្ចសម្ភាសន៍ដូចខាងក្រោម៖