ឥណទានសម្បទានរបស់រដ្ឋាភិបាលជប៉ុន ប្រមាណជា ១៨៥លានដុល្លារអាមេរិកត្រូវបានចុះហត្ថ​លេ​ខាផ្ដល់ជូនកម្ពុជា​សម្រាប់គាំទ្រកម្មវិធី​បន្ទាន់ដើម្បីឆ្លើយតបនឹងវិបត្តិនៃជំងឺ​កូវីដ-១៩បានធ្វើឡើងនៅព្រឹកថ្ងៃទី ១២ ខែមករា ឆ្នាំ២០២២ នៅវិមានសន្តិភាព ក្រោមអធិបតីភាព​របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជា​ណា​ចក្រកម្ពុជា។

ពិធីចុះហត្ថលេខាស្ដីពីឥណទានសម្បទាន ត្រូវបានធ្វើឡើងដោយឱ្យលោក ប្រាក់ សុខុន រដ្ឋមន្ត្រីការបរទេស​ និងសហប្រតិបត្តិការអន្តរជាតិ និងលោក MIKAMI Masahiro ឯកអគ្គរាជទូតជប៉ុន​ប្រចាំកម្ពុជា។ កិច្ចព្រមព្រៀងឥណទានសម្បទានសម្រាប់គម្រោង​គាំទ្របន្ទាន់ដើម្បី​ឆ្លើយតបនឹងវិបត្តិជំងឺកូវីដ-១៩ ដំណាក់កាលទី២នៅកម្ពុជា ត្រូវបានចុះហត្ថលេខា ដោយ​លោក អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ច​​ និងហិរញ្ញវត្ថុ និងលោកស្រី KAMEI Haruko ប្រធានទីភ្នាក់ងារសហប្រតិបត្តិការអន្តរជាតិ​នៃប្រទេសជប៉ុន (JICA)។

សូមបញ្ជាក់ថា កាលពីខែវិច្ឆិកា ឆ្នាំ២០២០ រដ្ឋាភិបាលជប៉ុនបានចុះហត្ថលេខាផ្តល់ហិរញ្ញប្បទានដល់គម្រោងនេះដំណាក់កាលទី១ ដែលមានទឹកប្រាក់​ចំនួន ២២៧ លានដុល្លារ​អាមេរិក។ សរុបរួម ឥណទានសម្បទានសម្រាប់គម្រោង​គាំទ្របន្ទាន់ដើម្បី​ឆ្លើយតបនឹងវិបត្តិជំងឺកូវីដ-១៩នៅកម្ពុជាពីរដ្ឋាភិបាលជប៉ុនទាំង២ដំណាក់កាលមានទឹកប្រាក់សរុបប្រមាណជា ៤១២លានដុល្លារសហរដ្ឋអាមេរិក៕