អាជ្ញាធរជាតិអប្សរាកំពុងដំណើរការជួសជុលព្រះពុទ្ធបដិមា ចំនួន៣អង្គបន្ថែមទៀតនៅរួតបាកាណនៃប្រាសាទអង្គរវត្ត ខណៈមួយអង្គបានធ្វើការជួសជុលរួចរាល់។ នេះបើយោងតាមការចុះផ្សាយលើផេកផ្លូវការរបស់អាជ្ញាធរជាតិអប្សរាកាលពីម្សិលមិញ។

ខ្លឹមសារនៃការចុះផ្សាយបានបញ្ជាក់ថា នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរា បានធ្វើការជួសជុលព្រះពុទ្ធបដិមានេះគឺនៅដើមខែកុម្ភៈ ឆ្នាំ២០២២ ការជួសជុលនេះត្រូវប្រើពេលវេលាចំនួន៥ខែ។ មន្ត្រីជំនាញបានបញ្ជាក់ពីមូលហេតុដែលនាំឱ្យព្រះពុទ្ធបដិមានៅរួតបាកាណរងការខូចខាតទ្រុឌទ្រោម ដោយសារកត្តាធម្មជាតិ ទីកន្លែងមានជ្រាបទឹក ទឹកហូរច្រោះ មានទឹកនោម និងលាមកសត្វប្រចៀវច្រើន ដូច្នេះក្រុមការងារធ្វើការរើសំណាញ់ចាស់ចោល ដើម្បីជំនួសនូវសំណាញ់ថ្មី ដែលសង្ឃឹមថា ប្រចៀវនឹងមិនអាចចូលទៅទុំនៅទីតាំងខាងលើបានទៀត។

គម្រោងជួសជុលព្រះពុទ្ធបដិមាខាងលើនេះសហការគាំទ្រគំនិតផ្តួចផ្តើម និងឧបត្ថម្ភថវិកាពីលោកស្រី សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍៕

ប្រភព និងរូបថត៖ អាជ្ញាធរជាតិអប្សរា